Për herë të pestë ka dështuar të konstituohet Komisioni Hetimor për rezervat shtetërore. Kjo për shkak mungesës së deputetëve të pushtetit.
Kryesuesi i këtij komisioni, Rashit Qalaj, ka ritheksuar se mungesa e deputetëve të pushtetit po i shton edhe më shumë dyshimet për keqpërdorime.
Edhe deputetja e Lidhjes Demokratike të Kosovës, Valentina Bunjaku, ka adresuar ankesa për partinë në pushtet.
“Është hera pestë dhe tashmë është e qartë që ata nuk po duan të marrin pjesë në këtë komision për të zbardhë të vërtetën. Nëse mendojnë se janë të pafajshëm duhet të vijnë dhe të përballën”, tha Bunjaku.
Ankesa pati edhe deputeti nga radhët e AAK-së, Pal Lekaj.
Lekaj tha se pushteti ka për qëllim ta fshehë të vërtetën.
"Po shihet qartë se atyre fare nuk u intereson interesi publik, por ai vetjak. Na kanë mbyt duke thënë se keni pas korrupsion, keqpërdorime, abuzime për 20 vjet dhe tashmë po e shihini se vetë janë për t'i mbrojtur vjedhjet. Çfarë ka ndryshuar VV-ja, kanë ndryshuar parimet, apo mënyra e abuzimit të shtetit, ku në këtë mënyrë mashtrojnë qytetarët e Kosovës për atë që kanë pasur kauzë luftimin e dukurive negative”, tha Lekaj.
Ndërkaq, takimi i radhës është vendosur të mbahet enjten nga ora 09:30. /KSP
