Presidenti serb, Aleksandar Vuçiq ka thënë se Serbia do ta hetojë vrasjen e policit Afrim Bunjaku në Banjskë të Zveçanit.
Duke mohuar përfshirjen e qeverisë së tij në këtë ngjarje të ndodhur të dielën, Vuçiqi ka thënë se Beogradi e dënon vrasjen e policit.
“Serbia do të nisë procedurat përpara organeve përkatëse gjyqësore dhe do të hetojë të dyshuarit”, ka thënë ai për Reuters.
Ai më tej e ka akuzuar Policinë e Kosovës se e ka qëlluar në kokë njërin prej personave të armatosur në distancë prej një metri, pasi ai ishte dorëzuar, duke e përshkruar atë si “ekzekutim”.
Vuçiqi ka mohuar akuzat e Presidentes Vjosa Osmani se Beogradi ka nxitur dhunën, duke thënë se Serbia nuk do të përfitonte asgjë prej kësaj, pasi kjo do ta rrezikonte pozicionin e saj në bisedimet e lehtësuara nga BE-ja.
"Pse kjo do të ishte e dobishme për Beogradin? Cila do të ishte ideja? Të shkatërrohet pozicioni ynë që kemi ndërtuar për një vit? Të shkatërrohet kjo brenda një dite? Serbia nuk do luftë”, ka thënë ai.
© KOHA. Të gjitha të drejtat janë të rezervuara.
