Sarrazin: E dënojmë fuqishëm sulmin terrorist ndaj Policisë së Kosovës

Emisari gjerman për Ballkanin Perëndimor, Manuel Sarrazin, e ka quajtur sulm kriminal dhe terrorist ndaj Policisë së Kosovës, ngjarjen e ndodhur të dielën në veri të vendit.

Pas takimit të zhvilluar të hënën me kryeministrin Albin Kurti, Sarrazini ka thënë se të dielën është parë një situatë e tmerrshme.

“Dje pamë një situatë të tmerrshme. E dënojmë fuqishëm këtë sulm kriminal dhe terrorist ndaj Policisë së Kosovës. Jemi këtu për të shprehur solidaritetin dhe ngushëllimet për familjarët, policinë e Kosovës dhe të gjithë shtetin”, ka thënë ai.

Sarrazini do të marrë pjesë edhe në mbledhjen komemorative që do të mbahet nga ora 12:30, në nderim të policit të rënë në detyrë, rreshter Afrim Bunjakut.

Pas kësaj mbledhje, Sarrazini pritet që të takohet edhe me presidenten Vjosa Osmani.

Emisari gjerman për Ballkanin Perëndimor, Manuel Sarrazin ka shkuar në Qeverinë e Kosovës për t’u takuar me kryeministrin Albin Kurti.

Vizita e tij është paralajmëruar të dielën nga Ministria e Punëve të Jashtme e Gjermanisë.

Sarrazin ka ardhur në Kosovë një ditë pas sulmeve në Banjskë të Zveçanit ku mbeti i vdekur një polic i Kosovës dhe tre të tjerë u lënduan, një prej tyre me armë zjarri.

© KOHA. Të gjitha të drejtat janë të rezervuara.