Avokati Hasani: Edukatoret që s’raportuan dhunën ndaj 3-vjeçarit po ashtu bënë vepër penale
Avokati i familjes së trevjeçarit të keqtrajtuar në çerdhen “Gëzimi Ynë” në Fushë-Kosovë, thotë se fëmija dhe familjarët janë të traumatizuar në lidhje me rastin. Ai ka thënë se fëmija po duhet vazhdimisht të qëndrojë me njërin prind dhe po zgjohet natën.
Avokati Nasuf Hasani në emisionin “60 Minuta” në KTV ka treguar se drejtoresha e kopshtit ka qenë shumë konstruktive dhe s’ka dashur ta fshehë rastin që ndodhi të premten.
Ai ka thënë se ishte drejtoresha ajo që ia dha xhirimet e kamerave familjarëve.
Hasani ka thënë se pret që dy edukatoret dhe kuzhinierja që shihen në xhirime duke keqtrajtuar fëmijën, duhet të pezullohen dhe të marrin dënimin e merituar.
“Pamjet janë shumë të qarta dhe komuna duhet të veprojë. Nëse shihet me kujdes incizimi, pak para se fëmija të dalë nga ajo dhoma, personi disa herë vrullshëm godet me dorë të djathtë. Ato lëvizje nënkuptojnë se ajo është duke ushtruar dhunë në raport me fëmijën”, ka thënë Hasani.
Hasani ka thënë se edhe edukatoret tjera që po qëndronin aty indiferente ndaj rastit dhe nuk e raportuan, kanë bërë po ashtu vepër penale.
“Është vepër penale që dënohet deri 3 vjet për mosraportim të abuzimit me fëmijë. Është abuzim. Është një indiferencë totale”, ka thënë Hasani.
Ai ka thënë se nuk ka dëshmi nëse fëmija ka qenë i ekspozuar ndaj dhunës edhe në të kaluarën, por ka shtuar se Policia i ka sekuestruar DVR e kopshtit dhe do ta shikojë rastin.
“Nëse vërtetohet se ka pasur edhe raste tjera të dhunës, atëherë normal që duhet të përgjigjen edhe për veprime që si kemi denoncuar deri sot. DVR i kopshtit është në duar të Policisë, Prokurorisë”, ka thënë Hasani.
