Sindikata e Bashkuara e Arsimit, Shkencës dhe Kulturës (SBASHK) ka lutur mësimdhënësit që të angazhohen maksimalisht e të kontribuojnë aq sa të munden që pajisja me tekste shkollore të bëhet në mënyrën më të mirë të mundur, siç thuhet, sidomos për nxënësit që vijnë nga familje me gjendje më të rënduar ekonomike.
Në një njoftim për media SBASHK-u i është përgjigjur edhe një deklarate të ministres së Arsimit, Arbërie Nagavci për Telegrafin, ku ajo kishte thënë se “nuk e kupton se interesat e kujt i përfaqëson” kreu i SBASHK-ut, Rrahman Jasharaj.
“Anëtare e anëtarë të SBASHK-ut, ministrja Nagavci, në vend që të kërkojë falje nga prindërit, nxënësit e mësimdhënësit për problemin që ka krijuar lidhur me tekstet shkollore, ajo kishte bërë pyetje se kë përfaqëson Jasharaj. Ajo, si duket, ka besuar se do të japë rezultate plani i saj dhe i ministrit Murati se duke krijuar pengesa, që nuk ndodhin në as një vend demokratik të botës, punëtorët e arsimit nuk do të regjistrohen si sindikalistë në e-Kosova dhe kështu do të shuhet SBASHK-u. Por, Nagavcit nuk ia paskan treguar lajmin se SBASHK-u nuk u shua, por vazhdon rrugëtimin me unitet të plotë e me shumë angazhime në shërbim të arsimit dhe do ta ngrit zërin në emër të anëtarësisë”, thuhet në reagimin e SBASHK-ut.
Sipas tyre Jasharaj përfaqëson mijëra e mijëra anëtare e anëtarë të Sindikatës që nga çerdhet e deri në universitete.
“Nagavci me tendencën për të krijuar përçarje deklarohet se ky vendimi i ri për tekstet shkollore qenka edhe në shërbim të mësimdhënësve. Ajo, mbase ka menduar se kështu i kursen nga lodhja e ndarjes se teksteve shkollore për nxënësit e tyre, por ata nuk e duan këtë kujdes sepse me kënaqësi e të lumtur e kanë kryer këtë veprim duke i parë të gëzuar nxënësit për tekstet e reja shkollore. Sa është kujdesur e kujdeset Nagavci për punëtorët e arsimit u pa kur i gëzohej angazhimit të Qeverisë për ndëshkim me ndalim pagash pse punëtorët e arsimit kishin qëndruar arsyeshëm në grevë. Dhe kur u bënte presion edhe me inspektorë që të mbajnë mësim për të kompensuar orët e humbura në grevë”, thuhet në reagim.
Sipas tyre, Nagavci po mundohet ta shuajë SBASHK-un. “Ministre mos u mundoni kot se sindikatën tonë u munduat ta shuani, por SBASHK-u ishte dhe mbetet sindikatë e punëtorëve të arsimit që nga çerdhet e deri në universitete dhe do të vazhdojë të jetë zë i tyre, thuhet në komunikatën për media të SBAShK-ut.
