Themelorja e lë sërish në paraburgim kryeshefin e pezulluar të KEK-ut, Nagip Krasniqi
Gjykata Themelore në Prishtinë ka marr vendim që t’ia vazhdojë paraburgimin edhe për dy muaj, kryeshefit të pezulluar të Korporatës Energjetike të Kosovës (KEK) Nagip Krasniqi, i cili është arrestuar nën dyshimin se ka kryer veprat penale “Keqpërdorimi i pozitës apo autoritetit zyrtar”, “Ushtrim i ndikimit” dhe “Konflikt i interesit”.
Këtë e ka konfirmuar për Kohën, Mirlinda Gashi, zëdhënëse e kësaj gjykate.
Vendimi i Themelores vjen pasi Gjykata e Apelit përmes aktvendimit kishte aprovuar ankesën e mbrojtësit të të pandehurit Krasniqi, avokatit Virtyt Ibrahimaga, duke anuluar aktvendimin e Gjykatës Themelore në Prishtinë me të cilin Krasniqit i ishte vazhduar masa e paraburgimit edhe për dy muaj, duke e kthyer çështjen në rivendosje.
Sipas Apelit vendimi i kaluar i Themelores për vazhdimin e paraburgimit për Krasniqin për dy muaj, “është përfshirë me shkelje esenciale të dispozitave të procedurës penale nga neni 384 paragrafi 1, nënparagrafi 1.10 dhe paragrafi 2 nënparagrafi 2.1 e lidhur me nenin 188 të Kodit të Procedurës Penale”.
Për këtë arsye sipas Apelit vendimi detyrimisht duhej anuluar dhe kthyer në rivendosje, siç thuhej në mungesë të arsyeve për faktet vendimtare në këtë çështje penale dhe moszbatimit të dispozitave të KPPK-së.
Më 19 prill, Prokuroria Speciale ka arrestuar kryeshefin e KEK-ut. Krasniqi sipas Prokurorisë, është arrestuar për shkak të dyshimit se ka kryer “Keqpërdorimi i pozitës apo autoritetit zyrtar”, “Ushtrimi i ndikimit” dhe “Konflikti i interesit”. Një ditë pas arrestimit, Gjykata Themelore në Prishtinë i kishte caktuar masën e paraburgimit prej një muaji për Krasniqin.
Ndërkohë, më 25 prill Bordi i KEK-ut, e ka pezulluar nga detyra e kryeshefit të kësaj korporate.
