Zyrtarë të sektorit publik trajnohen në kompaninë që është denoncuar nga MSH-ja
Në vitin 2019, Ministria e Shëndetësisë ka deponuar në hetuesi kontratat me kompaninë ndërkombëtare VAMED, nën dyshimin për keqpërdorime me projektin e Sistemit të Informimit Shëndetësor. Por, në majin e këtij viti, 20 zyrtarë të sektorit publik të shëndetësisë, përfshirë edhe anëtarë të kabinetit të ministrit Vitia shkuan në Vjenë për t’u trajnuar pikërisht nga kjo kompani
Njëzet zyrtarë të sektorit publik të shëndetësisë u trajnuan në fund të majit në Vjenë nga një kompani që Ministria e Shëndetësisë e pati denoncuar për dështim në funksionalizimin e Sistemit të Informimit Shëndetësor (SISH). E në mesin e zyrtarëve që morën mësime për nivelin bazik të menaxhimit të spitaleve janë përfaqësues të lartë të SHSKUK-së, njerëz të administratës së Ministrisë së Shëndetësisë dhe anëtarë të kabinetit të ministrit Arben Vitia.
Ministria e Shëndetësisë ndër vite kishte mungesë të kapaciteteve për operim të SISH-it nga ana teknike dhe për këtë kishte angazhuar operatorin e jashtëm, VAMED. Pas skadimit të kontratës Ministria refuzoi ta vazhdonte atë. Madje, në vitin 2019 ajo e dërgoi në hetuesi këtë kontratë bashkë me të tjerat që ishin lidhur me këtë kompani.
Ministria e Shëndetësisë ia ka konfirmuar KOHËS se 20 zyrtarë kanë marrë pjesë në këtë trajnim dhe se shpenzimet janë paguar nga Banka Botërore. Por, po ky institucion ka konfirmuar se shumë vlerësime e kanë kualifikuar angazhimin e kësaj kompanie në MSH si të dështuar.
“Kontrata nuk është shkëputur, ka përfunduar implementimi i fazës së parë dhe projekti nuk ka rezultuar i suksesshëm sipas raporteve përkatëse, me çka bazuar edhe ne rekomandimin e Auditorit, Rezolutën e Kuvendit të Kosovës, vendimin e KNSISH dhe gjetjeve përkatëse, lënda është adresuar tek organet e drejtësisë për shqyrtim të mëtutjeshëm”, thuhet në përgjigjen e këtij institucioni.
MSH-ja është pyetur se sa kontrata kishte VAMED me Ministrinë e Shëndetësisë. Nga ky institucion nuk kanë dhënë përgjigje për numrin e saktë të tyre, por kanë thënë së për të gjitha është vënë në dijeni hetuesia.
“Vetëm për SISH kanë qenë disa kontrata dhe e gjithë lënda është adresuar në organet e drejtësisë”, thuhet me tutje në përgjigjen e MSH-së.
Në vitin 2019 edhe ministri i atëhershëm i Shëndetësisë, Uran Ismaili, ka folur për arsyet se pse kjo kontratë nuk ishte vazhduar.
“Edhe mua më kanë thënë se ministri i kaluar ka qenë i gatshëm për vazhdimin e kontratës dhe unë i kam pyetur pse atëherë nuk është nënshkruar nga ai. Ka qenë një dokument për mirëmbajtje qindra mijëra euro dhe unë e kam konsideruar si tejet të lartë. Unë i kam lutur që të ma dërgonin një shkresë dhe kam qenë në gjendje që të diskutoja edhe me zotin (Imet) Rrahmani për ta pyetur se si ka qenë puna. Ata nuk kanë qenë në gjendje me më dhënë përgjigje të shkruar pasi kanë deklaruar se kanë qenë biseda të takimeve. Por, besoj se as ju, as unë nuk jemi në gjendje që të nënshkruajmë një kontratë qindra mijëra eurosh mbi bazën e bisedave të takimeve. Besoj se ka qenë një hezitim i drejtë i imi, edhe pse kanë qenë para të donatorëve. Më jam dhimbsur se ato para mund të hyjnë në sistemin shëndetësor”, ka deklaruar Ismaili në korrikun e vitit 2019.
KOHA ka dërguar pyetje për këtë çështje edhe tek VAMED e edhe tek Banka Botërore, por ata nuk kanë kthyer përgjigje.
Sistemi i Informimit Shëndetësor është një nga projektet me të kritikuara të Ministrisë së Shëndetësisë. I nisur prej me shumë se një dekade, ky projekt nuk ka arritur të përmbyllet me sukses ndonëse është parakusht për fillimin e zbatimit të Ligjit për Sigurime Shëndetësore.
