Mentor Vrajolli, nga Qendra Kosovare për Studime të Sigurisë, ka thënë se situata e sigurisë është e tensionuar.
Ai të hënën në një intervistë në emisionin “60 Minuta” të KTV-së ka folur edhe për reagimet e ndërkombëtarëve ndaj palës kosovare, që sipas tij kanë qenë shumë negative.
Sipas tij Qeveria është dashur të komunikojë më tepër me akterët ndërkombëtarë për mënyrën se si do të ju qasej këtyre problemeve.
“Zgjedhja e problemeve kërkon një mbështetje edhe nga pala ndërkombëtare, sidomos fakti që potenciali reagues i tillë është mjaft i madh dhe pas pasur një presion të madh të ndërkombëtarëve është shumë vështirë që institucionet e Kosovës të kenë një ecje të lehtë në zbatimin e sundimit të ligjit”, ka theksuar Vrajolli.
Ai ka thënë se është e vështirë që pala kosovare të zgjidhe problemet në veri, pasi që sipas tij, nuk ka as me kë të negociojë. “Po të negociojë me Listën Serbe, i bije që negocion direkt me Beogradin”, është shprehur Vrajolli.
Sipas tij duhet të shihet që ngërçi të zgjidhet, qoftë edhe duke dhënë dorëheqje kryetarët e rinj, në këmbim të një garance që do të mbahen zgjedhje të lira dhe demokratike.
Por për Vrajollin qeverisja nga distanca e kryetarëve të zgjedhur nuk është zgjidhja.
Sipas tij strukturat serbe që janë duke i bërë reagimet në veri, janë mjaft mirë të përgatitura për të mos kaluar, kufijtë e paralajmëruar në reagimet e ndërkombëtareve.
“Mendoj që reagimet janë mjaft mirë të planifikuara që në një farë forme të ketë një skenarë që nga kjo mund të nxirret diçka, përshkallëzimi i tepër do t’i dëmtonte këto struktura dhe mendoj që këto janë duke luajtur lojën në mënyrë të kontrolluar”, ka theksuar Vrajolli.
Ai ka thënë se mediat dhe zyrtarët lokalë të zgjedhur duhet të kenë kujdes pasi që situata është e rrezikshme edhe për ta.
© KOHA. Të gjitha të drejtat janë të rezervuara.
