Gjermania me qëndrim të njëjtë sikur SHBA-ja për gjendjen në veri
Ambasadori i Gjermanisë në Kosovë, Jorn Rohde, ka thënë se shteti që përfaqëson ka qëndrim të njëjtë sikurse Shtetet e Bashkuara të Amerikës për tensionit në veri gjatë të premtes.
Rohde në Twitter u ka bërë thirrje palëve që të përmbahen nga përshkallëzimi, ndërsa i ka bërë thirrje autoriteteve kosovare të punojnë ngushtë me KFOR-in dhe EULEX-in.
“Plotësisht dakord [për reagimin e Hovenierit]. U bëjmë thirrje të gjithëve që të përmbahen nga përshkallëzimi, u bëjmë thirrje autoriteteve kosovare që të punojnë ngushtë me të KFOR-in dhe EULEX-in”, thuhet në reagimin e Rohdes.
Shtetet e Bashkuara të Amerikës, përmes ambasadori Jeffrey Hovenier, e kanë dënuar aksionin e Policisë së Kosovës në veri. Hovenier ka theksuar se dhuna e sotme në veri duhet të ndalohet menjëherë.
Departamenti i Shtetit ndërkohë ka thënë se situata e sotme do të ketë pasoja për raportet Kosovë – SHBA.
Në mes tensionesh, kryetarët e rinj të tri komunave në veri të Kosovës – Leposaviq, Zveçan dhe Zubin-Potok - kanë hyrë në objektet komunale të premten, një ditë pas betimit. Atyre u është dashur ndërhyrja e Policisë për t’i larguar protestuesit dhe barrikadat para objekteve komunale. Policia është përballur me shok-bomba e të shtëna armësh nga protestuesit. Në anën tjetër, Serbia ka ngritur në gatishmëri të lartë luftarake ushtrinë.
Nga incidentet e sotme në veri, pesë policë janë lënduar, por më pas u janë kthyer detyrave policore. Ndërkohë, janë dëmtuar edhe katër automjete, përfshirë një i djegur. Është sulmuar edhe ekipi i KOHËS.
