Ambasadori i Gjermanisë në Kosovë, Jorn Rohde, ka refuzuar ta komentojë çështjen e “Visametricut”, operatori që detyronte aplikuesit për vizë të Gjermanisë që të paguanin shërbim postar për kthim të pasaportës, në vlerë prej 30 eurosh.
Pas një takimi me anëtarët e Komisionit Parlamentar për Punë të Jashtme të martën, Rohde i pyetur nga gazetarët për këtë çështje nëse do t’i hiqet licenca “Visametricut”, Rohde ka refuzuar të komentojë.
“Me sa unë e di është një rast në proces dhe nuk dua ta komentoj. Duhet ta pyesni 'Visametricun'”, ka theksuar ai.
Sipas Flamur Abdullahut, avokati që pati bërë padinë kolektive ndaj “Visametricut”, vlera e përfituar nga kjo kompani ka qenë milionëshe.
Ka më shumë se dy javë që kur KOHA ka dërguar pyetje në drejtim të “Visametricut” për të sqaruar vendimin e MINT-it për t’i rimbursuar qytetarët. Kompania nuk ka kthyer përgjigje. E përfaqësues të saj nuk kanë pranuar të jenë pjesë e debatit në “Konfront” të mërkurën e shkuar.
