Arbëri

Profesionistëve shëndetësorë nuk u llogariten pagat me koeficiente të reja

Me gabime në përllogaritjen e koeficientit që e përcakton Ligji i ri i Pagave është bërë ekzekutimi edhe i pagave të treta për profesionistët shëndetësorë. Në disa prej spitaleve rajonale treguan për diskrepancë të madhe në kalkulim të pagave, ndërsa në SHSKUK thanë se po punohet në korrigjimin e pagave dhe theksuan se të gjithë ata që kanë marrë të ardhura mujore më pak sesa përcaktohet me ligj, do të kompensohen

Që nga shkurti, kur ka nisur zbatimi i Ligjit të Pagave, profesionistët shëndetësorë janë ankuar se kanë hasur në probleme, me pagën e tyre mujore. Edhe në këtë muaj, pagat atyre u kanë dalë në mospërputhje me koeficientet.

Në spitalet rajonale treguan të enjten se mjekëve dhe infermierëve nuk u janë llogaritur pagat bazë dhe kujdestaritë me koeficientet e reja, të caktuara me këtë ligj.

Bazuar në pretendimet që i kanë shprehur në këto spitale, diskrepanca në llogaritje të pagave është e madhe dhe se me gjithë përditësimin e listave të punëtorëve shëndetësorë, gabimet nuk janë rregulluar nga Shërbimi Spitalor Klinik dhe Universitar i Kosovës (SHSKUK).

Në Spitalin e Prizrenit kanë treguar për llogaritjet e gabuara të koeficienteve.

“Me Ligjin e Pagave, shefit të repartit, që është mjek specialist, llogaritja e pagës duhet t’i bëhet me koeficientin 12.2, ndërsa është llogaritur me koeficientin 7.35. Disa pozita janë llogaritur me koeficientin 12.00. Me Ligjin e Pagave, kryeinfermierit të repartit llogaritja e pagës duhet t’i bëhet me koeficientin 6.2, ndërsa është llogaritur me koeficientin 4. Ka edhe disa pozita të tjera në stafin e infermierisë, administratë, shërbime teknike e të tjera”, thuhet në një përgjigje të këtij spitali.

Situatë e njëjtë është përshkruar edhe në Spitalin e Gjilanit.

“Me gjithë përmirësimet e bëra te ne dhe të dërguara në instancat më të larta, ende një pjesë e gabimeve nuk është përmirësuar. Mirëpo jemi vazhdimisht në kontakt me instancat më të larta përmes Departamentit të Burimeve Njerëzore në SHSKUK dhe i kemi premtimet që të gjitha gabimet do të përmirësohen. Një pjesë e gabimeve është evituar me pagën e prillit dhe besojmë që do të përmirësohen të gjitha gabimet”, thuhet në përgjigjen e shkruar, që kanë ofruar autoritetet e Spitalit të Gjilanit.

Edhe në Spitalin e Mitrovicës konfirmuan se gabimet në llogaritje i kanë shoqëruar edhe pagat e treta të ekzekutuara, që nga nisja e zbatimit të Ligjit për Paga.

“Se sa është vlera, nuk mund ta di, pasi që ajo varet nga profili i punëtorit shëndetësor, si dhe nga koeficienti. Nga administrata e spitalit kanë shkuar llogaritjet në rregull, por gabimi është si duket nga qendra apo diku tjetër – nuk mund ta di”, kanë thënë Luljeta Bucinca-Zhubi, drejtoreshë e Spitalit të Mitrovicës.

E në Spitalin e Pejës, nëpërmjet një komunikimi elektronik, kanë paralajmëruar SHSKUK-në për veprimet që mund t’i ndërmarrin punëtorët, shkaku i pakënaqësive për pagat. Porse, me gjithë insistimin e KOHËS, në këtë institucion nuk kanë saktësuar se për çfarë veprimesh bëhet fjalë.

Janë tri spitale, menaxhmentet e të cilave nuk treguan nëse edhe te stafi i tyre janë evidentuar problemet me paga: Spitali i Gjakovës, ai i Ferizajt dhe Spitali i Vushtrrisë.

E, në SHSKUK kanë thënë se, sa i përket llogaritjes së pagës bazë dhe kujdestarive, nuk ka asnjë gabim.

Sherif Bytyqi, shef i zyrës së financave në SHSKUK, ka theksuar se gabime në llogaritje nuk duhet të quhen gabimet në vlerësimin, përkatësisht pozicionimin e disa pozitave ose vendeve të punës.

Ai ka thënë se, bazuar në vendimin e Qeverisë, me kohë janë dhënë vërejtjet dhe rekomandimet, për të korrigjuar mundësisht gabimet e vërejtura duke propozuar rritje apo ulje të koeficienteve për pozitat e caktuara e përherë duke pasuar parasysh detyrat e punës, përgatitjen profesionale, nivelizimin, barazimin, mosdiskriminimin dhe koeficientet e paraparë me Ligjin e ri të Pagave.

“Me kohë janë marrë masat dhe janë dërguar listat e të gjithë punëtorëve për të cilët është vërejtur dhe është menduar se ka gabime e moskënaqësi reale në koeficientet e pozitave të caktuara dhe për këtë është kërkuar dhe rekomanduar nga DMZP-ja që ato koeficiente duhet të korrigjohen. Për këtë jemi në pritje nga DMZP-ja për të marrë përgjigje”, ka thënë Bytyqi. “Periudha e korrigjimeve bazën e ka në gabimet e pagës së muajit shkurt 2023, ku pagat janë ekzekutuar sipas Ligjit të ri të Pagave e të cilat gabime kanë vazhduar në shumicën e rasteve, edhe në pagën e muajit mars dhe muajit prill 2023”.

Sipas tij, deri tash janë bërë disa korrigjime të koeficienteve nga DMZP-ja, e të cilat është filluar të zbatohen në pagën e muajit prill 2023 sipas korrigjimeve për muajin shkurt 2023. Ai ka thënë se njëjtë do të vazhdohet edhe në muajt vijues, derisa të korrigjohen të gjitha gabimet.

“Këto korrigjime të pranuara deri më tani nga DPZ-ja kanë qenë vetëm korrigjime që kanë pasur të bëjnë me ulje koeficienti – page, ndërsa sa u përket rekomandimeve për rritje të koeficientit-pagës, të kërkuara nga DMZP-ja ende nuk kemi pranuar përgjigje”, ka thënë Bytyqi. “Pritet që edhe për këto raste të pranohen korrigjime dhe për to gjithashtu të kemi përgjigje sa më shpejt”.

Ai ka theksuar se pas korrigjimeve do të bëhet kompensimi respektiv për të gjitha rastet.

Krahas pagës bazë, një pjese të infermierëve nuk u janë paguar as orët shtesë të punës, pagesat e rrezikshmërisë, si dhe shtesat e tjera të parapara me ligj.

Bytyqi ka thënë se këto nuk janë duke u paguar.

“Pagesa e shujtës, ajo nuk është duke u paguar jo vetëm për stafin e mesëm mjekësor, por për askënd, për asnjë staf në SHSKUK, që nga aplikimi i Ligjit të ri të Pagave”, ka thënë ai. “Sa i përket rrezikshmërisë, kjo asnjëherë deri më tani nuk është paguar, por mendojmë se jo vetëm për këtë, por edhe për të gjitha shtesat e tjera të parapara me ligjet në fuqi duhet të bëhen përgatitjet e duhura dhe të mundësohet implementimi i tyre”.

E, për mosekzekutimin e shtesave të rrezikshmërisë, një ditë më parë ka reaguar edhe Sindikata e Policisë së Kosovës.

Përkitazi me këto probleme, gjatë ditës nuk ofruan informacione në Ministrinë e Financave. E ditë më parë, zyrtarë të këtij institucioni kanë theksuar se bashkë me Ministrinë e Punëve të Brendshme është duke u punuar në evitimin e gabimeve.