Deputetët e pushtetit në seancën e jashtëzakonshme të thirrur të enjten, kanë miratuar disa nga pikat e papërfunduara në disa seanca plenare.
Deputetët e PDK-së të enjten e kanë lëshuar Kuvendin pasi që nuk është votuar mocioni i tyre për të futur në rend dite diskutimin lidhur me arrestimin e drejtorit të KEK-ut, Nagip Krasniqi, ndërsa deputetët e LDK-së dhe të AAK-së, në shenjë proteste për siç kanë thënë, faktin që Qeveria po do të ua marrë të hyrat vetjake komunave.
Vazhdimi i këtyre seancave plenare kishte dështuar të mbahej të mërkurën, në mungesë të kuorumit.
Në seancën e jashtëzakonshme deputetët e shumicës parlamentare kanë miratuar Raportin vjetor të Autoritetit Rregullator për Shërbimet e Ujit për vitin 2021 dhe Raportin vjetor për gjendjen e mjedisit në Kosovë për vitin 2021.
Kuvendi gjithashtu ka miratuar rekomandimet lidhur me Raportin e auditimit të performancës “Vlerësimi i nxënësve në testet kombëtare dhe ndërkombëtare si dhe rekomandimet për mbikëqyrjen e zbatimit të Ligjit për komunikimet elektronike.
Në parim është miratuar Projektligji për ndryshimin dhe plotësimin e Ligjit për mjekësinë ligjore.
Ndërkohë që nuk ka kaluar Raporti vjetor të Komisionit të Pavarur për Miniera dhe Minerale për vitin 2021.
© KOHA. Të gjitha të drejtat janë të rezervuara.
