Prokuroria e Policia janë gati për zgjedhje, në EULEX shprehin drojë
Në Polici e edhe në Prokurori kanë theksuar se janë ndërmarrë të gjitha masat në funksion të ofrimit të sigurisë në veri në ditën e zgjedhjeve. Por, në EULEX theksuan se situata është e brishtë. E ekspertë politikë, por edhe të sigurisë, thanë se nuk ka ambient për organizim të zgjedhjeve
Autoritetet në Kosovë theksuan se janë ndërmarrë të gjitha veprimet, në funksion të ofrimit të sigurisë gjatë organizimit të zgjedhjeve të parakohshme në katër komunat e veriut, të banuara kryesisht me Serbë.
Në Polici thanë se, me kohë janë planifikuar dhe janë ndërmarrë masat e nevojshme konform urdhrit operativ, i cili parasheh të gjitha masat e sigurisë, para, gjatë dhe pas procesit zgjedhor.
“Policia e Kosovës është institucion i zbatimit të ligjit dhe të gjitha veprimet e saj i ndërmerr konform autorizimeve ligjore dhe kushtetuese, si dhe konform planifikimeve operacionale policore. Po ashtu, edhe në rastet kur organizohen zgjedhje qendrore apo lokale, Policia e Kosovës në bashkëpunim dhe koordinim me institucionet kompetente me kohë planifikon dhe ndërmerr masat e nevojshme policore konform urdhrit operativ, i cili parasheh të gjitha masat e nevojshme të sigurisë, para, gjatë dhe pas procesit zgjedhor”, thuhet në njoftimin e Policisë.
Në KQZ është organizuar një takim i trupës ndërinstitucionale për mbarëvajtjen e zgjedhjeve, në të cilin pos zyrtarëve të këtij institucioni, kanë marrë pjesë edhe përfaqësues të Prokurorit të Shtetit dhe gjyqësorit.
Prokurorja speciale, Laura Pula, e cila është koordinatore nacionale për zgjedhje, tregoi për masat e ndërmarra në prag të organizimit të votimit.
“Si përfundim ju njoftoj se Prokurori i Shtetit në interes të mbrojtjes se votës, në vazhdimësi angazhohet në zgjedhjet lokale dhe nacionale sipas planit operativ dhe procedurave standarde të veprimit me Policinë e Kosovës. Gjithashtu, për zgjedhjet e jashtëzakonshme të datës 23 prill 2023, në katër komunat kemi caktuar prokurorë kujdestarë, si dhe policë hetues dhe gjyqtarë kujdestarë të caktuar nga institucionet relevante”, ka thënë Pula.
E në misionin evropian për sundimin e ligjit, EULEX, thanë se gjendja e sigurisë është e ndjeshme.
“Gjendja e sigurisë në veri të Kosovës mbetet e brishtë. Edhe vakumi i sigurisë e i sundimit të ligjit i krijuar pas dorëheqjeve të policëve, prokurorëve, gjyqtarëve dhe stafit mbështetës serb po vazhdon. EULEX-i po e monitoron nga afër situatën e sigurisë në veri të Kosovës, edhe në kontekstin e zgjedhjeve të jashtëzakonshme për katër kryetarë komunash dhe dy kuvende komunale në veri të Kosovës. Në këtë kuptim, po i shqyrtojmë skenarët e mundshëm, në koordinim të ngushtë me Policinë e Kosovës dhe me KFOR-in”, thuhet në njoftimin e EULEX-it.
E ekspertë politikë, por edhe të sigurisë, thanë se nuk ka ambient në veri për organizim të zgjedhjeve.
“Nuk mund të organizosh zgjedhje me kontejnerë në vitin 2023. Infrastruktura për të mbajtur zgjedhje duhet të jetë e mirë. Pastaj elementet e tjera përcjellëse të zgjedhjeve, duhet të jetë atmosfera dhe duhet të jetë që zgjedhjet nuk mbahen”, ka thënë Naim Rashiti, drejtor i Grupit për Ballkan (BPRG).
Sonja Stojanoviq – Gajiq, po ashtu eksperte e sigurisë, tërhoqi një paralele me situatën e viteve ’90.
“Është situata e njëjtë sikur e shqiptarëve në vitet e 90-a, kur shqiptarët nuk pranonin zgjedhjet e Serbisë. Nuk mendoj se rezultatet e pakicës mund të konsiderohen legjitime për tërë popullsinë. Sa i përket Listës Serbe, për popullsinë e veriut, u takon atyre ta zgjedhin partinë, por e dimë se ata nuk kanë shumë ambient konkurrues”, ka thënë ajo.
Zgjedhjet në veriun e banuar kryesisht me serbë ishte paraparë të mbaheshin në dhjetor të vitit të kaluar, por ato u shtynë nga presidentja Vjosa Osmani, me rekomandim të ndërkombëtarëve dhe të organeve të sigurisë.
