Në fund të muajit kryeministri Albin Kurti dhe presidenti i Serbisë, Aleksandar Vuçiq, pritet të diskutojnë për statutin e Asociacionit të Komunave me Shumicë Serbe. Sipas Marrëveshjes së 2013-s, dokumenti duhet të hartohet nga ekipi menaxhues, i përbërë nga zyrtarë të propozuar nga komunat e veriut të banuara kryesisht me serbë. Për përbërjen e këtij grupi, legjitimitetin e tij e procedurat drejt formimit të Asociacionit nuk janë deklaruar në BE dhe as në Qeveri. E, njohësit e dialogut thonë se procesi duhej të ishte transparent
Qeveria dhe as Bashkimi Evropian nuk u kanë dhënë përgjigje paqartësive rreth hapave që duhet të ndiqen për formimin e Asociacionit të komunave me shumicë serbe.
Marrëveshja për Asociacionin përcakton se një ekip menaxhues duhet të hartojë draftstatutin. Por, asnjëra palë nuk ka treguar nëse mbetet në fuqi përbërja e vjetër e ekipit.
Drejtori i Institutit për Politika Sociale “Musine Kokalari”, Visar Ymeri, thotë se e gjithë kjo situatë është e rrezikshme për Kosovën. Sipas tij, procedurat për hartimin e statutit do të duhej të ishin publike.
“Nëse Qeveria e Kosovës e di procedurën e nuk po flet për të, unë nuk kam mirëkuptim në këtë mungesë transparence. Ka procedura të cilat duhet të mbahen të fshehta sepse është taktikë negociatash dhe nuk pajtohem me të, por procedura e përpilimit të statutit nuk është gjë sekrete dhe do të duhej të ishte publike. Secili qytetar i Republikës së Kosovës duhet të dijë se kush janë ata persona që do ta përpilojnë këtë draft dhe çfarë ndodh me atë draft pastaj në negociata, si ecim tutje dhe si vijmë deri te fundi”, thotë Ymeri.
E ish-ministri i Pushtetit Lokal, Sadri Ferati, thekson se kushdo që e harton draftin e statutit atë duhet ta bëjë në përputhje me Kushtetutën.
“Nuk e di se si do të emërtohet ky grup që do të punojë, por roli i Qeverisë do të jetë që ta analizojë statutin dhe ta shfrytëzojë edhe ndihmën e Gjykatës Kushtetuese në mënyrë që ai të mos bjerë ndesh me Kushtetutën e Republikës së Kosovës, të jetë në pajtim me frymën e Kushtetutës, të mos bjerë ndesh me asnjë nen të saj”, thotë ai.
Ferati, i cili është nga Mitrovica, thotë se në prag të zgjedhjeve në veriun e banuar kryesisht me serbë, për Kosovën situata është rrethanë rënduese për të emëruar një ekip të ri të menaxhimit.
“Ato komuna duhet patjetër të jenë funksionale, në mënyrë që të mund t’i delegojnë personat në grupin punues edhe të punojnë. Është një situatë jo shumë e volitshme sa i përket nisjes së punës rreth statutit dhe për habinë time kjo nuk ka qenë fare diskutim në dialogun e fundit që është organizuar”, thotë ish-ministri.
Sipas marrëveshjes, anëtarë të ekipit menaxhues duhet të jenë përfaqësues të deleguar nga secila prej katër komunave të veriut, të banuara kryesisht me serbë.
Një grup i tillë është formuar në kohën e ish-kryeministrit Isa Mustafa. Ai kryesohej nga Vinka Radosavljeviq, ndërsa anëtarë ishin Dejan Radojkoviq, Igor Kalamar dhe Svetislav Durleviq. Pjesë e ekipit ishin edhe zyrtarë të Ministrisë së Pushtetit Lokal, të OSBE-së dhe BE-së.
Përbërja e tij është ndryshuar më vonë e kryeministri Albin Kurti ka kontestuar legjitimitetin e kësaj trupe duke thënë se në të është deputetja e Kuvendit të Serbisë, Danijela Vujiçiq.
Gjatë kohës sa Qeveria drejtohej nga Ramush Haradinaj, grupi menaxhues e ka dorëzuar në ekzekutiv një draftstatut të Asociacionit. Por, për ekzistimin e tij nuk kanë folur në Qeveri dhe BE.
Draftstatuti i Asociacionit pritet të prezantohet në takimin e radhës që do ta kenë kryeministri Kurti dhe presidenti i Serbisë, Aleksandar Vuçiq.
Visar Ymeri pret që diskutimi të mos jetë i lehtë.
“Kur të shkojë drafti te palët do të ketë një proces të diskutimit të draftit derisa të vijmë te teksti i pranueshëm për të dyja palët. Unë mendoj që ky proces do të jetë i vështirë dhe ka gjasë të zgjasë shumë duke pasur parasysh qëndrimet e kundërta që i kanë palët për sa i përket statutit dhe mënyrës se qysh do të funksionojë Asociacioni”, ka thënë ai.
Ndonëse ende nuk është konfirmuar data e takimit, kryeministri Kurti ka bërë të ditur se ai do të mbahet në fund të prillit.