Deputeti i Lidhjes Demokratike të Kosovës, Avdullah Hoti, ka ironizuar me Qeverinë pas vendimit të Bordit të Zyrës së Rregullatorit të Energjisë për shtrenjtim të energjisë elektrike. Ai ka thënë se pavarësisht shtrenjtimit të tatimit në pronë dhe energjisë, me rëndësi është se “ministrit po i tepron buxheti”.
“23 janar 2023 — Tatimi në pronë u rrit 100% për shumë familje. 30 mars 2023 — Energjia elektrike u rrit 15.4%. Urime!!! Me rëndësi ministrit po i tepron buxheti. Është gëzuar se e ka mbyllur vitin 2022 me suficit. Ka harruar se suficiti është rezultat i bllokimit të investimeve kapitale”, ka shkruar Hoti në Facebook të enjten pasdite.
Ai i është referuar një postimi të ministrit të Financave, Hekuran Murati, se deficiti buxhetor është zvogëluar në “rekord historik”.
“Financat publike janë kthyer në binarë dhe thesi i shqyer është qepur. Jemi kujdesur që të mos shkaktojmë barrë të paqëndrueshme financiare e të mos rrisim borxhin publik, përkundër faktit që kishim pakot mbështetëse më voluminoze në rajon”, pati shkruar Murati para dy ditësh.
Këtë postim të Muratit më herët gjatë ditës e ka komentuar edhe Blendi Hasaj nga Instituti GAP. Ai ka thënë se ka pasur nënshpenzim.
“Sikur Qeveria ta kishte realizuar buxhetin e vitit 2022 ashtu siç e ka propozuar vet, ose siç e ka rishikuara gjatë vitit, e që i bie ta kishte realizuar planin e punës së saj, deficiti do të kapte vlerën prej -468 milionë euro dhe jo -46.1 milionë euro. Pra, kemi pas nënshpenzim të theksuar; dihet se në cilën kategori (shih figurën). Tash, Qeveria duhet të përqendrohet dhe me tregu se a e kanë pas mirë atëherë kur kanë planifikuar deficit 10 herë më të lartë, rrjedhimisht shpenzime më të larta, apo tash? Ose, a i bie më mirë që s’kanë punuar sa kanë planifikuar? Ngjashëm, duhet të tregoi se si e ndikon pozitivisht ekonominë nënshpenzimi (kryesisht) në kapitale?”
© KOHA. Të gjitha të drejtat janë të rezervuara.
