Arifi: Ambasadori Hill premtoi se do t’i bëjë presion Beogradit për shqiptarët e Luginës
Kryetari i Bujanocit, Nagip Arifi, ka deklaruar se ambasadori i Shteteve të Bashkuara të Amerikës në Serbi, Christopher Hill, u ka premtuar shqiptarëve të Luginës së Preshevës se do t’i bëjë presion Serbisë që t’i zgjidhen çështjet këtij komuniteti.
Ai ka thënë në “60 Minuta” të KTV-së të mërkurën se me ambasadorin Hill biseduan për rreth një orë, e u trajtuan tri çështje, që sipas Arifit, janë shumë të rëndësishme për shqiptarët në Luginë.
“Tema kryesore ishte pasivizimi i shqiptarëve nga organet shtetërore, ku po tentohet të zvogëlohet numri i shqiptarëve. Mosnostrifikimi i diplomave të qytetarëve që studiojnë në universitetet e Kosovës dhe tema e tretë ishte moskyçja e shqiptarëve në organet shtetërore të Serbisë”, ka deklaruar ai.
Sipas Arifit, ambasadori i Shteteve të Bashkuara të Amerikës në Beograd është mik i shqiptarëve, e ai iu ka premtuar ndihmë për tejkalimin e çdo pakënaqësie.
Për çështjet e pazgjidhura të shqiptarëve të Luginës, Arifi ka shtuar është i njoftuar edhe Departamenti Amerikan i Shtetit.
“Kemi pasur vizita në Washington dhe iu kam bërë me dije kërkesat dhe kemi kërkuar që në takimet e ardhshme të hapet edhe çështja e të drejtave të shqiptarëve në Luginë. Ambasadori ishte i njoftuar për këto çështje, kësaj here ka marrë një pasqyrë të vërtetë të shkeljes së të drejtave të shqiptarëve të Luginës së Preshevës”, ka thënë kryetari i Bujanocit.
Sipas tij, Marrëveshja e Ohrit, e arritur më 18 mars mes Kosovës dhe Serbisë nuk i përfshin shqiptarët e Luginës, por siç ka thënë ai, Serbia s’do të mund të ecën drejt Bashkimit Evropian pa i zgjidhur telashet e Luginës së Preshevës.
“Në çdo takim me Kurtin kemi kërkuar që edhe tema e shqiptarëve të Luginës të jetë temë e dialogut. Kjo çështje s’ka qenë në marrëveshjen e Ohrit, por Serbia s’mund të shkojë drejt BE-së pa zgjidhjen e çështjes së shqiptarëve të Luginës. S’mund t’i garantohet komunitetit serb në Kosovë të drejta, e jo komunitetit shqiptar në Serbi”, ka shtuar ai.
Arifi ka thënë se pos pasivizimit të shqiptarëve, problematike është edhe mungesa zhvillimit ekonomik, e infrastrukturës dhe e teksteve shqipe për nxënësit në shkollat e mesme.
“Asnjë tekst mësimor në shkollat e mesme nuk ekziston në gjuhën shqipe. Qeveria e Kosovës ka ndarë buxhet për tekstet në shkollat e mesme, por planprogramet e Serbisë nuk përputhen me tekstet shqipe. Profesori jep shënime për nxënësit në shkollat e mesme. Në çdo takim e kam adresuar këtë problematikë te kryeministri. E ky problem është nga vitet e ‘90-ta”, ka thënë Arifi.
Sipas tij, vetëm 300 shqiptarë kanë mbetur në Medvegjë, e situata e pasivizimit të shqiptarëve është alarmante.
