Adresohet kushti për rikthimin e Agjencisë së Akreditimit në ENQA dhe EQAR
Projektligji, miratimi i të cilit është një nga kushtet për rikthimin e Kosovës në organizatat ndërkombëtare për arsim, të enjten ka arritur të kalojë në Komisionin për Arsim, vendimmarrje që pati dështuar për disa herë radhazi si shkak i mungesës së kuorumit. Por disa nga rekomandimet e kryetarit të komisionit, Ardian Golës, u kritikuan nga ORCA, e cila i kundërshtoi përmes një aksioni simbolik para Kuvendit. Veprimet e ORCA-s i kualifikoi kërcënuese deputeti Gola
Komisioni për Arsim ka arritur të enjten të dërgojë për shqyrtim dhe miratim në seancë plenare projektligjin për Agjencinë e Kosovës për Akreditim (AKA), i cili është përcaktues në rikthimin e Kosovës në organizatat ndërkombëtare për arsim, siç janë: Regjistri Evropian për Sigurimin e Cilësisë në Arsimin e Lartë (EQAR) dhe Asociacioni Evropian për Sigurimin e Cilësisë në Arsimin e Lartë (ENQA). Kjo vendimmarrje pati dështuar disa herë, në mungesë kuorumi.
Por disa nga rekomandimet e kryetarit të komisionit, Ardian Gola, për AKA-në i ka kritikuar aktivistë të Organizatës për Rritjen e Cilësisë në Arsim, ORCA, përmes një aksioni simbolik para Kuvendit. Ata vendosën një kali nga kartoni, i cili sipas tyre, simbolizon “kalin e Trojës në cilësinë e arsimit”.
Sipas hulumtuesit në ORCA, Dibran Hoxha, deputeti Gola me propozimin që standardet e akreditimit të përcaktohen përmes udhëzimeve administrative, është duke tentuar ta degjenerojë ligjin duke ia hequr kompetencat Agjencisë në përcaktimin e kritereve.
Hoxha ka thënë se ky propozim u konvenon kolegjeve private.
“Tendencat e vazhdueshme të deputetit Ardian Gola mbeten të paqarta për ORCA-n, por të dyshimta gjithsesi... Deputeti Gola ka bërë ndërhyrje në draftin origjinal të projektligjit duke ndryshuar nenet që lidhen me akreditimin krahas nivelit të studimeve, gradës shkencore dhe publikimeve shkencore që duhet t’i kenë bartësit e programeve në proces të akreditimit”, ka thënë Hoxha, i cili theksoi se kjo mund ta pengojë rithkimin në organizata ndërkombëtare.
Gola i ka quajtur të pabaza akuzat e ORCA-së, ndërsa qasjen e aktivistëve të kësaj organizate e ka kualifikuar kërcënuese.
“ORCA ka huqje aq të mëdha, aq kanë kritikën personalizuese dhe aspak sistemike, sa që mua më vjen keq që është organizata e vetme që sot ka zë në arsimin në Kosovë. Qasja e saj është shumë intimiduese, është qasje kërcënuese dhe ka një diskurs kriminalizues, sidomos për Universitetin e Prishtinës. Kjo është gabim”, ka thënë ai.
Por për propozimin që ORCA e kritikoi, Gola nuk mori përkrahje as nga partia e tij, Lëvizja Vetëvendosje.
Në mbledhjen e komisionit, kaloi rekomandimi që të vendoset me udhëzim administrativ përshtatshmëria e bartësit të programeve.
Gola ka thënë se kjo do të ndalojë praktikën penalizuese që sipas tij, ka prekur disa nga profesorët të cilët janë diskualifikuar sa i përket kualifikimit për një program.
“Aktualisht edhe KSHC-ja, nuk e ka një metodë krejtësisht të qartë sesi duhet të vlerësohet... Unë mendoj që padrejtësisht disa probleme janë penalizuar duke i diskualifikuar disa profesionistë e profesorë, për shkak se nuk e paska përshtatshmërinë dhe kualifikimin e duhur për një program, a nëse e shikon CV-në e sheh qartë që në fakt i plotëson kushtet. Kjo është mungesa e një protokolli që në mënyrë të qartë i detajon mënyrat se si duhet të vlerësohet përshtatshmëria”, ka thënë ai.
Një nga rekomandimet e miratuara nga deputetët është ai që përcakton që të bëhet akreditimi me kusht për një periudhë njëvjeçare nga Këshilli Shtetëror i Cilësisë për ato programe që kanë interes nacional, edhe nëse nuk e plotësojnë ndonjërin nga standardet e akreditimit.
Kjo nuk u përkrah nga kryetari i Agjencisë, Naim Gashi, i cili ka thënë se është kundër që një program të marr dritën e gjelbër nëse nuk plotëson të gjitha standardet e akreditimit.
“Çdo gjë që shkon jashtë procesit të vlerësimit, unë jam kundër”, ka thënë ai.
Qëllimi bazë i Projektligjit për AKA-në është të përcaktojë statusin e Agjencisë, me qëllim të sigurimit të transparencës, cilësisë dhe zhvillimin e arsimit të lartë në përputhje me standardet evropiane. Sipas Projektligjit, Agjencia do të jetë institucion rregullativ.
Për këtë ka pasur kritika nga organizatat “Demokracy+ dhe GLPS, të cilat vlerësojnë se agjenci rregullatore mund të jenë vetëm institucionet që rregullojnë dhe mbikëqyrin tregun. Por statuti i Agjencisë është përkrahur nga Zyra e Bashkimit Evropian. Sipas kësaj zyre, është në përputhje me Standardet dhe Udhëzimet Evropiane për Sigurimin e Cilësisë në Arsimin e Lartë -ESG.
