Adelina Hasani, hulumtuese e politikës së jashtme, ka thënë se dokumenti i publikuar të hënën për normalizimin e marrëdhënieve Kosovë-Serbi është hap shumë pozitiv për të shkuar drejt marrëveshjes finale.
Ajo në Interaktiv ka thënë se Asociacioni i komunave me shumicë serbe është një lloj shantazhi që mund të përdoret për ta arritur një marrëveshje. Ka shtuar se Aleksandër Vuçiq nuk është i gatshëm ta nënshkruajë marrëveshjen me njohjen e Kosovës në të.
“Nëse flasim për marrëveshje që krijon për njohje formale të Kosovës, i bie që Vuçiq ta përgatisë shoqërinë për njohjen de jure të Kosovës. Presidenti i Serbisë nuk është gati ta nënshkruajë një marrëveshje të tillë, gjithsesi kjo në vete paraqet një lloj shantazhi. Flasim ndaj BE-së. Nëse flasim për një aneks marrëveshje implementuese i bie që do të jetë i përfshirë Asociacioni”.
Hasani ka theksuar se dokumenti evropian ka dykuptimësi, duke përmendur nenin 7 i cili ka zgjuar debat që prej publikimit.
Sipas saj, pa marrëveshje do të pasojnë sanksione ekonomike nga BE-ja.
“E kemi nenin 7 që tërthorazi flet edhe për Asociacionin, që tregon se do të krijohet Asociacioni gjithsesi nuk është pika kryesore e marrëveshjes. Tregon që do të krijohet por edhe që lë hapësirë që të diskutohet. Besoj se neni 7 do të jetë problematik. Neni 7 na mundëson ta ridiskutojmë Asociacionin. Nëse nuk ka marrëveshje dhe dakordim, do të ketë sanksione, do të jenë sanksione ekonomike sepse duhet të ketë stabilitet brenda Ballkanit Perëndimor sepse po ndodh një luftë (në Ukrainë). Kujt i duhet status quoja, askujt”.
Hasani është shprehur se njohja zyrtare nga Serbia, do ta sillte edhe njohjen nga pesë shtetet mosnjohëse brenda BE-së – Spanja, Greqia, Sllovakia, Qipro dhe Rumania.
“Nëse do të ketë njohje formale, do ta sjellë edhe njohjen e pesë shteteve. Nëse një marrëveshje implementohet vjen edhe njohja. Por me skepticizëm të tillë, me narrativen që po e dëgjojmë nga Vuçiqi ende pa u nënshkruar një marrëveshje, është problematike të pritet njohja e pesë vendeve. Ndoshta Greqia do të ishte mbështetëset e para. Problemi do të vazhdonte me Spanjën për arsye të brendshme të Spanjës”.
© KOHA. Të gjitha të drejtat janë të rezervuara.
