Në krah të Ukrainës, gazetarja ukrainase: Kosova na kupton më së miri sepse vetë i mbijetoi luftës

"Një vit më parë bota mori kah tjetër. Në një vjetorin e fillimit te kësaj lufte të tmerrshme dhimbja është e madhe për jetët e humbura e solidarizimi maksimal. Lufta e Ukrainës është luftë për të mbrojtur vlerat e lirisë dhe demokracisë kudo në botë. Ne duhet të jemi unik dhe të vendosur kundër çdo përpjekje për t’i minuar parimet e vlerat tona evropiane. Më 1999 bota demokratike u vu në anën e Kosovës... sot bota është në anën e Ukrainës sepse e drejta është në anën e saj”.

Kryetari i Kuvendit, Glauk Konjufca, ka thënë se gazetarët ukrainas kanë bërë shumë më shumë me raportimin e tyre tash se në të gjitha vjetët e punës së tyre.

Konjufca ka shtuar se populli ukrainas ka treguar qëndresë frymëzuese.

“U bënë një vit dhe gjatë një viti ne jemi dëshmitar të një qëndrese të paepur dhe shumë frymëzuese të popullit të Ukrainës. Kosova qëndron fuqishëm me Ukrainën dhe qysh kur lufta nisi ky adresim dhe ky invazion i Rusisë kundër Ukrainës, Kosova menjëherë e ka dënuar këtë sulm të padrejtë dhe të patolerueshëm. Në Kuvend e kemi miratuar edhe rezolutën e cila e shpreh gatishmërinë e Kosovës për strehimin e ukrainasve në vendin tonë e po ashtu të gazetarëve. E kuptojmë më së miri se si është t’i lëni familjet e juaja në luftë e zjarr”.

E, kryeministri Albin Kurti ka thënë se Ukraina duhet të fitojë për t’u ruajtur paqja në Evropë.

“Lufta e Rusisë ndaj Ukrainës ishte shokuese por jo edhe befasuese. ... Populli i Kosovës i kupton shumë mirë këto shifra vuajtjet që shkaktojnë... e në një ditë të zymtë si kjo megjithatë jemi të lumtur që Kosova është bërë shtëpi për 12 gazetarë ukrainas. Ukraina duhet të fitojë sepse vetëm kështu do të ruhet paqja dhe demokracia në kontinentin e Evropës”.

Gazetarja ukrainase, Ludmila Makey, ka thënë se qytetarët e Kosovës e kuptojnë më së miri luftën në Ukrainë sepse vetë i mbijetuan luftës. Ajo ka shprehur falënderime për strehimin dhe mbështetjen që po i jep Kosova Ukrainës.

“Pushtuesit planifikonin të merrnin Kievin brenda 3 ditësh, por ata hasën në rezistencë të ukrainasve. Kjo rezistencë zgjati 365 ditë. Dua t’ju tregoj shumë për heroizmin e ushtarëve tanë, për mijëra civilë të vrarë për qytetet e shkatërruara.. dua të them faleminderit. Dua t’ju them dhe falënderoj në emër të gazetarëve për shkak se Kosova na strehoi në një kohë shumë të vështirë. Prishtina u bë shtëpia jonë e dytë. Këtu ndihemi mirë dhe të qetë çdo ditë e ndjejmë mbështetjen e politikaneve dhe kolegëve dhe qytetarëve që thjeshtë që na afrohen dhe na pyesin se si i kem familjet. Ju na kuptoni më së miri sepse vet qytetarët i mbijetuan luftës”.

© KOHA. Të gjitha të drejtat janë të rezervuara.