Kryetari i Partisë Demokratike të Kosovës, Memli Krasniqi, ka thënë se nuk mund të ketë shtet të zhvilluar pa sektor privat të fuqishëm.
Në një takim të mbajtur të enjten me ndërmarrës dhe përfaqësues të bizneseve në Gjilan, Krasniqi ka thënë se ky është një konkluzion i përbashkët me ta, sidomos në periudhën e krizës ekonomike në të cilën gjendet vendi.
Ai ka akuzuar qeverisjen aktuale qendrore për trajtim armiqësor ndaj bizneseve.
“Ata ndanë shqetësimin për mungesën e fuqisë punëtore, sepse shumë profesionistë po e lënë Kosovën në mungesë të perspektivës në vend. Ky fakt, përveç i dhimbshëm, është edhe shqetësues. Me këtë trend të ikjes, Kosova po rrezikon të mbetet një vend i braktisur. Keqqeverisja dhe trajtimi armiqësor ndaj bizneseve, po i dekurajon ndërmarrësit. Kjo politikë i ka larguar edhe ata pak investitorë të huaj që kishin filluar ta shohin Kosovën si vend potencial për investime”, ka shkruar ai në Facebook.
Sipas Krasniqit, shteti duhet të ketë rolin e vet si partner dhe krijues i kushteve më të mira për bizneset të cilat duke u rritur e forcuar, krijojnë vende pune të qëndrueshme me paga dinjitoze.
© KOHA. Të gjitha të drejtat janë të rezervuara.
