Haradinaj: Jasharët ndryshuan rrjedhën e historisë
Në 15 vjetorin e pavarësisë së Kosovës edhe kryetari i Aleancës për Ardhmërinë e Kosovës, Ramush Haradinaj, bashkë me deputetë të kësaj partie kanë bërë homazhe e nderime te varri i ish presidentit, Ibrahim Rugova.
Haradinaj nga aty tha se sot nderojnë angazhimin e Rugovës për lirinë dhe pavarësinë e Kosovës.
“Çdo herë do të përulemi me respekt para angazhimit, kontributit të gjithëve. Ne i nderojmë me respekt të rënët për liri, martirët, por po ashtu respektojmë figurat historike që janë themel I pavarësisë dhe lirisë tonë. E kam nderin sot që të respektoj dhe nderoj pranë varrit presidentin historik, Rugovën në shenj respekti e nderimi për angazhimin e tij jetësor për pavarësinë dhe lirinë“, tha Haradinaj.
Ai ka bërë homazhe edhe në Prekaz te Memoriali “Adem Jashari” nga ku ka nderuar sakrificën për liri të kësaj familje.
“Në Prekaz, aty ku buron liria. Nderimi është i përhershëm për Jasharajt dhe Kryekomandantin Adem Jashari, të cilët ndryshuan rrjedhën e historisë sonë të re”, ka shkruar në Facebook.
Në përvjetorin e 15 të shpalljes së pavarësisë së Kosovës, homazhe kanë bërë edhe krerët shtetëror, presidentja, Vjosa Osmani e shoqëruar nga homologu i saj shqiptar, Bajram Begaj, kryeministri, Albin Kurti e kryekuvendari, Glauk Konjufca./ KP
