Drejtori i Zyrës për Kosovën në Qeverinë e Serbisë, Petar Petkoviq, ka thënë të mërkurën se nëse kryeministri i Kosovës, Albin Kurti, nuk dëshiron ta mundësojë formimin e Asociacionit të komunave me shumicë serbe, atë e bën dikush tjetër.
Petkoviqi e ka cilësuar Kurtin si kërcënimin më të madh për stabilitetin në rajon dhe pengesë për përparimin në procesin e normalizimit të marrëdhënieve ndërmjet Kosovës dhe Serbisë, raportoi mediumi serb “Kosovo Online”.
“Rezistenca e tij kokëfortë ndaj formimit të Asociacionit të komunave me shumicë serbe, si dhe shpikja e vazhdueshme e justifikimeve për mosveprim në këtë çështje është konfirmim i shovinizmit të tij të pashërueshëm anti-serb”, ka thënë Petkoviq.
Sipas tij, qëllimi i Kurtit është krijimi i një mjedisi monoetnik në veri.
“Asociacioni i komunave serbe duhet të formohet në përputhje me marrëveshjet e arritura në kuadër të dialogut të Brukselit ndërmjet Beogradit dhe Prishtinës dhe nëse ai nuk dëshiron ta bëjë të mundur, do ta mundësojë dikush tjetër. As populli serb në Kosovë dhe as shteti i Serbisë nuk do të heqë dorë nga kjo kërkesë”, është shprehur ai.
© KOHA. Të gjitha të drejtat janë të rezervuara.
