Arbëri

Murati jep shenja për tërheqje nga politika që ndikoi në rritjen e tatimit në pronë

Ministri Hekuran Murati arsyetoi në dy paraqitje publike gjatë ditës, rivlerësimin që u është bërë pronave, e që ka pasur ndikim në rritje të tatimit. Por, ai dha sinjale se Qeveria është e gatshme të gjejë një formulë, nëpërmjet së cilës qytetarët nuk do ta ndienin rritjen sivjet. Deputetët ia kundërshtuan propozimet dhe i kërkuan ta pezullojë vendimin për rivlerësim të pronave.

Ministri i Financave, Hekuran Murati, ka dhënë sinjale se Qeveria është e gatshme të gjejë një formulë, nëpërmjet së cilës qytetarët nuk do ta ndienin rritjen e tatimit, të reflektuar pas rivlerësimit të pronave.

Murati tha se Qeveria është në proces të hartimit të Ligjit të ri për pronat, me të cilin do të parashihet tatimi progresiv. Sipas tij, në këtë ligj mund të përfshihet një dispozitë që parasheh lehtësira për vitin aktual.

“Meqë këto janë të hyra të komunave u takon komunave të vendosin dhe të tregojnë çfarë duan të bëjnë. Ne jemi të gatshëm të mbështetim çfarëdo kërkese që kanë komunat për uljen e tatimit të vitit aktual, qoftë duke shkuar për të gjithë njësoj, qoftë duke marrë një përqindje të rritjes për ta falur si tatim që të mos ngarkohen qytetarët”, tha ai.

Ministri Murati raportoi edhe në Komisionin parlamentar për Buxhet, Transfere dhe Financa, pasi shkaktoi pakënaqësi në masë rritja e vlerës së tatimit në pronë, shkaku i rivlerësimit. Ai tha se rritjen e tatimit 100 për qind të tokave nga ky vit e parasheh Ligji për Tatim në Pronë i miratuar në kohën e Qeverisë Mustafa, e i hyrë në fuqi në Qeverinë Haradinaj.

Ai dha edhe një propozim.

“Si ministër unë do të sugjeroja që të gjitha komunat, meqenëse jemi në gjendje krize po pajtohemi të gjithë, e vështirësi të inflacionit, le të ua falin 100 eurot e para për secilin tatim pagues të tatimit në pronë. A e mbështesni këtë?” tha Murati.

Ligjvënësit nuk e mbështetën. Ai u përball me kërkesën edhe të vetë bashkëpartiakëve që janë anëtarë të Komisionit, që ta pezullojë vlerësimin e pronave, i cili është reflektuar në tatim.

“Më e rëndësishme sesa rishikimi i vlerësimit të pronave do të ishte pezullim ndoshta deri në një datë. Të krijojmë një komision parlamentar që do të gjenim një zgjidhje bashkërisht edhe me komunat. Mendoj qe ky propozimi për falje e 100 eurove nuk është korrekt”, u shpreh Eman Rrahmani, deputet i VV-së.

“Si qenka propozim ky, hajde a jeni edhe ju për 100 euro. Çfarë propozimi është ky? Propozim është të kthehesh në zyrë e t’i bëni vlerësimet, ndikimin buxhetor, afatin ligjor... dhe hajde nesër ose të hënën të mblidhemi dhe të diskutohet. Propozimi ynë si opozitë dhe i imi e i grupit tonë parlamentar është që të shtyhet deri më janar 2024. Votat tona i keni plotësisht”, tha deputeti i LDK-së, Avdullah Hoti.

“Po thirresh në nisma të kaluara. Po me dhjetëra ligje keni kontestuar, keni çuar lëndë nëpër gjykata. Pse nuk keni marrë nismë me ndryshu një ligj të keq që e ka pru qeveria Mustafa. Pse nuk e ke ba? Pse po fshihesh tash pas ligjit dhe pas Isa Mustafës”, deklaroi Ferat Shala i PDK-së.

Pas rivlerësimit që Ministria e Financave ua ka bërë pronave, nga janari qytetarët janë përballur me vlerë tatimi deri në katërfish më të lartë, krahasuar me vitin paraprak.