Deputeti i Aleancës për Ardhmërinë e Kosovës, Shemsedin Dreshaj, ka kërkuar nga deputetët që të mbështesin ndryshimin e Ligjit për skemat pensionale të financuara nga shteti, në mënyrë që të hiqet kriteri për 15 vjet përvojë pune para luftës, për të përfituar pension kontributdhënës.
Dreshajt të martën në një konferencë për media, ka thënë se nisma ligjore të cilën si parti e kanë proceduar në Kuvend në maj të vitit të kaluar, duhet të mbështetet, sidomos pas vendimit të Gjykatës Kushtetuese, lidhur me këtë Ligj.
Ai ka thënë se derisa Kushtetuesja ka marr vendim, ata janë në proces të ndryshimit dhe plotësimit të këtij Ligji. Sipas Dreshajt me ndryshimet që do të bëhen, secili qytetar do të marr pension për aq vite sa ka punuar dhe jo siç ka qenë deri më tani, që për të marr pension kontribut dhënës është dashur t’i kesh 15 vite përvojë pune deri në janar të vitit 1999.
Ai ka thënë se për këto ndryshime deri më tani nuk e kanë pasur mbështetjen e Lëvizjes së Vetëvendosjes e cila është në pushtet.
Dreshaj ka thënë se pas vendimit të Kushtetueses, pret që të gjithë deputetët e Kuvendit do ta mbështesin ndryshimin e Ligjit.
Në dhjetor të vitit të kaluar Gjykata Kushtetuese ka shpallur antikushtetuese disa nene të këtij ligji si dhe disa të Udhëzimit Administrativ për kategorizimin e shfrytëzuesve të pensionit kontributpagues sipas strukturës kualifikuese dhe kohëzgjatjes së pagesës së kontributeve.
“Gjykata, njëzëri, vendosi që (i) kërkesa është e pranueshme; dhe (ii) paragrafi 2 i nenit 8 të Ligjit nr.04/L-131 për Skemat Pensionale të Financuara nga Shteti në lidhje me nën-paragrafin 2.3 të paragrafit 2 të nenit 6 të Udhëzimit Administrativ nr.09/2015 për “Kategorizimin e Shfrytëzuesve të Pensionit Kontributpagues sipas Strukturës Kualifikuese dhe Kohëzgjatjes së Pagesës së Kontributeve-Stazhit Pensional”, nuk janë në përputhshmëri me nenin 24 [Barazia para Ligjit] në lidhje me nenin 14 (Ndalimi i diskriminimit) dhe nenin 1 (Ndalimi i Përgjithshëm i Diskriminimit) të Protokollit nr. 12 të Konventës Evropiane për të Drejtat e Njeriut”, thuhet në njoftimin e Kushtetueses.
Sipas Dreshajt bazuar në vendimin e Kushtetueses, ndryshimi në këtë Ligj duhet të bëhet brenda gjashtë muajve.
“Duam të ju informojmë lidhur me vendimin e Gjykatës Kushtetuese, që ka vendosur që të largohet neni 8, paragrafi 2 i ligjit për skemat pensionale kontributdhënëse dhe njëkohësisht që nga Udhëzimi administrativ i Ministrisë së Punës dhe Mirëqenies Sociale, ku në mënyrë diskriminuese të gjitha gradimet të cilat janë bërë në institucionet e Kosovës gjatë viteve të 90’ në institucionet e Kosovës, atëherë paralel me sistemin okupues, ato nuk janë validuar”, ka theksuar Dreshaj.
Në këtë konferencë shefi i Grupit Parlamentar të AAK-së, Besnik Tahiri, ka folur për vizitën e Këshilltarit të Departamentit Amerikan të Shtetit, Derek Chollet, i cili të mërkurën pritet të vijë në Kosovë. Ai ka thënë se kryetari i AAK-së, Ramush Haradinaj, do të mbajë një takim me Cholletin.
Tahiri ka theksuar se si AAK vazhdojnë të besojnë se arritja e një marrëveshjeje ligjërisht të obligueshme në mes të Kosovës dhe Serbisë duhet të ndodh.
Deputetët e AAK-së në këtë konferencë kanë thënë se do të mbështesin edhe iniciativën për tërheqjen e 30% të mjeteve të Trustit.
© KOHA. Të gjitha të drejtat janë të rezervuara.
