Këshilli për Mbrojtjen e të Drejtave dhe Lirive të Njeriut (KMDLNJ) konsideron se situata në veri është e rëndë dhe se qytetarëve po u kushtëzohet liria e lëvizjes.
Kryetari i KMDLNJ-së, Behxhet Shala ka thënë se barrikadat e vendosura nga serbët lokalë po pengojnë procesin mësimor, furnizimin, qasjen në shërbime publike e shëndetësi.
Sipas tij, barrikada është një testim që serbët e kanë bërë që nga lufta e Kroacisë.
“Është një gabim i madh në qoftë se mendohet që të drejtat e njeriut janë të rrezikuara në veri dhe nuk iu ka mbetur tjetër rrugë përveç barrikadave. Barrikada është një testim që kanë bërë serbët qysh nga lufta e Kroacisë edhe për fat të keq gjithmonë ju ka ndezur”, ka thënë kryetari i KMDLNj-së.
Mëngjesin e së martës janë vendosur edhe dy barrikada tjera në veri me dy kamionëve të mbushur me zhavorr.
Shala ka thënë për KosovaPress se barrikadat e vendosura po menaxhohen nga Beogradi.
“Realisht është një situatë e rëndë, është një situatë e cila kushtëzon lirinë e lëvizjes për gjithë qytetarët atje, shqiptarë, serbë e të tjerë. E pengon procesin e arsimit, furnizimit, qasjes në shërbime publike e shëndetësi. Është një situatë krejtësisht e padurueshme, mirëpo barrikadat janë vendosur nga një qendër, nga Beogradi, menaxhohen nga Beogradi dhe ato janë vendosur me qëllim që ta vënë Kosovën në para një akti të kryer në mënyrë që ata ta forcojnë pozitën negociuese. Ndërkaq, Kosova e dobëson pozitën negociuese, për faktin që tash në qoftë se hyhet në bisedime apo pashmangshëm do të hyhet në bisedimeve për ato barrikada, ata do të kenë kërkesa të reja që më parë nuk i kanë pasur”, deklaron Shala.
Për barrikadat e vendosura nga serbët lokalë, Shala shton se bashkësia ndërkombëtare nuk po bën presion.
Kryetari i KMDLNj-së thekson se kjo situatë mund të shpërthejë nëse nuk bëhet vlerësimi i duhur nga palët.
“Meqë kemi hyrë në një cak të mbyllur është bukur problem të intervenohet sepse çdo intervenim i PK-së apo institucioneve të Kosovës do të merrej si një veprim i dhunshëm dhe do ta provokonte reagimin e palës tjetër, por mendoj që edhe ndërkombëtarët që janë shumë opurtunist në këtë çështje, as ata nuk do të lejonin që me një veprim të pamatur qoftë të njërës palë, e qoftë të tjetrës të kontribuohet në përshkallëzimin e situatës”, përfundon Shala.
Tash e më shumë se dy javë, në veri të vendit janë vendosur barrikada nga serbët lokalë. Vendosja e barrikadave të para nisi për të kundërshtuar arrestimin e ish-policit serb të Kosovës, Dejan Pantiq./ksp
