Kurti paralajmëron takim me KFOR-in për barrikadat në veri: S’mund të tolerohen pafundësisht

Kryeministri i Kosovës, Albin Kurti, ka paralajmëruar një takim me komandantin e KFOR-it për të sqaruar se si do të veprohet me barrikadat në veri, tash kur janë bërë dy javë që kur rrugët në drejtim të pikave kufitare me Serbinë, në Bërnjak e Jarinjë, janë të bllokuara.

Në një konferencë për media të shtunën, Kurti ka thënë se “barrikadat s’mund të tolerohen pafundësisht”. Ai ka thënë se pas Krishtlindjeve do të takohet me komandantin e KFOR-it për të vendosur.

Serbët lokalë kanë bllokuar rrugët duke thënë se veprimin e kanë bërë si protestë ndaj arrestimit të ish-policit serb të Policisë së Kosovës, Dejan Pantiq, si të dyshuar për sulm ndaj Policisë së Kosovës dhe Komisionit Qendror Zgjedhor.

“KFOR-i ka kërkuar pak kohë nga ne. Ne i kemi dhënë pak kohë, por jemi dëshmitarë që sot janë bërë dy javë, qëkur janë vendosur 11 barrikada në veri të lumit Ibër dhe po pengojnë lirinë e lëvizjes. KFOR-i gjithmonë është zotuar për ambient të qetë e të sigurt me vlerë kryesore lirinë e lëvizjes. Ka qenë vlera kryesore të cilën e ka afirmuar KFOR-i në këto 23 vjet e më shumë të pasluftës në Kosovë. Edhe ne i kemi dhënë kohë KFOR-it pikërisht për shkak se liria e lëvizjes është konsideruar vlera themelore në Kosovë nga pikëpamja e KFOR-it. E tash lirinë e lëvizjes nuk e kemi sepse janë 11 barrikada, që siç e dini, s’janë civile, si të protestuesve francezë më 1968 në Paris, por janë të uniformuar, të armatosur e të pozicionuara asisoj që më shumë kanë të bëjnë për ta mbrojtur personin e uniformuar e armatosur që të shtinë mbi veturat që vijnë sesa të mos lejojnë tejkalimin e automjeteve në anën tjetër të barrikadës. Me fjalë të tjera s’janë barrikada civile. KFOR-i ka kërkuar kohë ne e kemi dhënë atë kohë, por meqë sonte është Krishtlindja ne duhet ta kemi shumë shpejt, pas Krishtlindjeve, një takim me komandantin e KFOR-it e në të cilin besoj se do të sqarojmë gjithçka. Por kjo s’mund të tolerohet pafundësisht. U bënë dy javë e s’mund të lejojmë që edhe javë e javë të kalojnë e të mos kemi lirinë e lëvizjes. Nga ai takim që e presim menjëherë pas Krishtlindjeve besoj se do të sqarohet gjithçka e do të japim përgjigje”, ka thënë Kurti.

KFOR-i të premten në një deklaratë për media kërkoi që kjo çështje të zgjidhet nëpërmjet dialogut.

Kryeministri i Kosovës, Albin Kurti, është lavdëruar që masat e marra nga Qeveria e tij për krizën energjetike kanë dhënë efekt deri tash, por ka apeluar që kursimi nga qytetarët të intensifikohen për muajin janar e shkurt.

Në një konferencë për media të shtunën, Kurti ka thënë se me masat e marra për krizën energjetike kanë ulur me 8 për qind konsumin e energjisë elektrike në krahasim me vitin e kaluar.

“Gjatë vitit 2022, kemi ndarë 85 milionë euro për qytetarët në përballje me këtë krizë të madhe. Me subvencionimin e faturave për të gjithë, e kemi evituar rritjen e çmimit për familjen, komunat e institucionet publike që konsumojnë 800 kWh. Kemi mundësuar çmime më të lira se në rajon. Më subvencionimin shtesë për ata që kursejnë kemi ndihmuar mbi 161 mijë familje në shtator, mbi 212 mijë familje në muajin tetor. Është rritur numri atyre që kursejnë muaj pas muaji. Kemi bërë shpërblim për ata që kursejnë. Me këto masa, kemi balancuar nevojën e qytetarëve për të evituar rritjen e çmimit të energjisë dhe kemi vepruar në përputhje me strategjinë e energjisë. Kemi arritur të ulim konsumin e energjisë elektrike me 8 për qind krahasim me vitin e kaluar. Veçanërisht në amvisëri, në muajin nëntor kemi arritur deri në 15 për qind”, ka thënë Kurti.

Kreu i ekzekutivit falënderoi qytetarët që po kursejnë energjinë elektrike dhe ka thënë se falë kësaj u mundësua që të ketë furnizim të rregullt, pa reduktime.

Por ka bërë thirrje që në muajin janar e shkurt të kursehet edhe më shumë.

“Çmimi i një megavat për orë është mbi 500 euro, tetëfishi i asaj që paguani ju në fatura. Janari e shkurti do të jenë periudha të vështira, temperaturat bien dhe çmimet e energjisë ngrihen në tregjet ndërkombëtarë. Kërkojmë që ta intensifikoni kursimin”, ka deklaruar Kurti.

Kurti ndërkohë ka pasur vërejtje për komunat dhe bizneset, për të cilat ka thënë se nuk ka parë ndonjë shenjë kursimi. I ka paralajmëruar se nëse vazhdojnë kështu, subvencionimi për ta nuk mund të bëhet në të ardhmen.

Ndërkaq ministrja e Ekonomisë, Artane Rizvanolli, ka thënë se sivjet investimet në efiçiencë të energjisë “janë rritur shumëfish”. Ajo po ashtu ka thënë se janë siguruar më shumë se 400 milionë euro investime për sektorin e energjisë.

“Nga to, 330 milionë euro janë projekte për investime të reja në energji, që do të realizohen gjatë viteve në vijim. Pra vetëm sivjet kemi siguruar financim për investime në sektorin e energjisë më shumë sesa janë realizuar në total gjatë katër dekadave të fundit”, ka thënë ajo duke shtuar se “po vihen themelet e sektorit modern të energjisë”.

“Gjërat e mira vijnë ngadalë, sidomos për energjinë ku vlera e investimeve është e lartë e kompleksiteti do kohë”, ka thënë ajo.

© KOHA. Të gjitha të drejtat janë të rezervuara.