Eksperti i ekonomisë kritikon qasjen e Qeverisë për inflacionin: Ka bërë pak për qytetarët
Eksperti i ekonomisë, Florin Aliu, ka thënë se inflacioni ka qenë problemi kryesor ekonomik i Kosovës për vitin 2022, duke kritikuar Qeverinë se ka bërë pak për t’i ndihmuar qytetarët për ta përballuar këtë gjendje.
Sipas Aliut, inflacioni i madh është i rrezikshëm për qytetarët e rëndomtë, jo për Qeverinë e bizneset. Shton se shkaku i inflacionit të madh, Qeveria e Kosovës e ka buxhetin më të madh ndonjëherë.
“Inflacioni në Kosovë i kaloi ato nivelet e pranueshme 3-4 për qind, që i shëndetshëm për ekonominë. Inflacioni ka shkuar 20 për qind në bazë të Bankës Botërore. Inflacioni i madh është i rrezikshëm për qytetarët, jo për Qeverinë, jo për bizneset. Qeveria prezantoi buxhetin më të madh ndonjëherë. Kjo vjen si rezultat i inflacionit të madh”, ka thënë Aliu, që si problematike për këtë vit e ka vlerësuar edhe çështjen e migrimit.
Aliu ka thënë se në muajin nëntor në Kosovë inflacioni ishte 11 deri 12 për qind. Konsideron se është në nivel të keq për qytetarët, duke shtuar se nuk ka rritje pagash.
Eksperti i ekonomisë pati kritika për Qeverinë, për të cilën ka thënë se “s’ka bërë asgjë ose ka bërë pak”.
“Është dashur që të ketë kupona konvertibil, si në shtetet e zhvilluara. Ua jep qytetarëve me të ardhura të ulëta, që i mundëson me atë kupon të blejë vetëm ushqime bazë. Kjo është reformë. Nuk është reformë kur Kurti dhe vartësit e tij marrin një vendim. Nuk jam për me nda pare, sikur ato 100 eurot. Sepse ti e ki qëllimin, por nuk dihet a arrihet qëllimi, pasi me ato para dikush mund të blejë drogë, alkool”, ka shtuar Aliu në "Java Sonte Me Rronin" të KTV-së.
