Arbëri

Mujka – kryeshef i “Ibër-Lepencit” pa përmbushur të gjitha pikat e konkursit

Faruk Mujka është zgjedhur kryeshef ekzekutiv i “Ibër-Lepencit” pa e përmbushur një pikë të konkursit, e cila u kërkonte kandidatëve që në 36 muajt para aplikimit të mos ishin bartës të ndonjë posti udhëheqës ose vendimmarrës në një parti politike. E njëjta përmbajtje ndodhej edhe në deklaratën nën betim që e ka firmosur Mujka, ani se deri para një viti ai e ka drejtuar degën e Lëvizjes Vetëvendosje në Mitrovicë

Kur Faruk Mujka ka konkurruar për kryeshef ekzekutiv të “Ibër-Lepencit”, ka nënshkruar një deklaratë nën betim në të cilën thuhet se në periudhën prej 36 muajsh para datës së aplikimit nuk ka qenë bartës i ndonjë posti udhëheqës ose vendimmarrës në një parti politike.

“…është ose në çfarëdo kohe gjatë periudhës 36 muajsh para datës së aplikimit ka qenë (i) zyrtar i zgjedhur publik, (ii) i emëruar politik ose (iii) bartës i një posti udhëheqës ose vendimmarrës në një parti politike;”, shkruhet në deklaratën nën betim, të cilën çdo kandidat gjatë aplikimit për pozitën si kryeshef duhet ta nënshkruajë.

Mujka thotë se i qëndron pas nënshkrimit, ani se deri para 14 muajsh e ka drejtuar degën e Lëvizjes Vetëvendosje në Mitrovicën Jugore.

"Unë kam aplikuar dhe i kam përmbushur të gjitha kriteret, kërkesat e caktuara me konkurs. Unë e kam nënshkruar atë çka është kërkuar në deklaratën nën betim dhe i qëndroj asaj”, ka thënë Mujka.

Bordi i “Ibër-Lepencit”, i emëruar prej Qeverisë së drejtuar nga partia në të cilën ka shërbyer Mujka, e ka emëruar kryeshef ekzekutiv.

Një nga anëtarët e Bordit ka thënë se nuk e ka ditur për funksionin që kryeshefi i zgjedhur ka pasur në Vetëvendosje, por insiston se zgjedhja ka qenë e ligjshme.

“Përzgjedhja e kryeshefit të ‘Ibër-Lepencit’ ka qenë konform procedurave ligjore që e rregullojnë këtë çështje, Kodi i Etikës, rregulloret e brendshme dhe ka qenë një proces jashtëzakonisht transparent”, ka thënë Muzafer Luma, anëtar i Bordit të drejtorëve. Sipas tij, mbi 70 ditë ka qenë procesi i hapur, dy herë ka qenë i shpallur. “Ka qenë një interesim jashtëzakonisht i madh, mbi 40 kandidatë kanë aplikuar, 27 janë thirrur, që i kanë plotësuar kushtet, ndërsa 25 janë intervistuar”, ka thënë Luma.

Edhe konkursi ka precizuar që kandidatët duhej ta përmbushnin pikën 17.2. të Ligjit për Ndërmarrjet Publike, sipas së cilës, në 36 muajt e fundit ata nuk duhej të kishin pozitë udhëheqëse në parti.

Në procedurat e aplikimit njëri prej dokumenteve të kërkuara është deklarata nën betim, në të cilën thuhet se kandidati i plotëson kriteret e pavarësisë.

“Një deklaratë nën betim të nënshkruar nga kandidati se i plotëson kriteret e pavarësisë sipas nenit 17.1 dhe nenit 17.2…”, kërkohet në procedurë të aplikimit.

Në shoqërinë civile thonë se zgjedhja kryeshef e Mujkës një vit pasi që ka dhënë dorëheqje nga pozita partiake bie në kundërshtim me dispozitat e Ligjit.

“Nëse zhvillohet një proces gjyqësor ose një proces administrativ dhe vjen deri në konstatim që kjo deklaratë është e rrejshme, atëherë mund të konsiderohet që është falsifikim dhe në njëfarë mënyre atëherë mund të vijë deri tek marrja e mandatit si kryeshef ekzekutiv për z. Mujka”, ka thënë Arton Demhasaj, drejtor ekzekutiv i organizatës “Çohu”.

Por, Mujka insiston se për pozitën ku është zgjedhur i lejohet të jetë “politikisht i varur”.

“Në vendim shkruan se të gjitha palët që kanë ankesë duhet t’iu drejtohen Gjykatës Themelore. Kjo është për mua valide. Unë nuk jam jurist, jam inxhinier dhe tani kryeshef i ndërmarrjes ‘Ibër-Lepenci’”, ka thënë Mujka teksa ka shtuar se nuk gjendet dikush pa “të shkuar politike”. “Shoqëria kosovare është shumë e ngushtë në këtë rreth dhe unë mendoj se është vetëm në benefit të shoqërisë tonë, që dikush me një eksperiencë të tillë, me një histori të tillë, me një mundësi që të kontribuojë në këtë ndërmarrje dhe për ketë shoqëri të shfrytëzoje kapacitet e tij për të mirën e shoqërisë, për të mirën në zhvillimin ekonomik të vendit tonë", ka thënë kryeshefi i ndërmarrjes publike.

Mujka, është pyetur edhe nëse mbanë ende pozitën si asamblist i Lëvizjes Vetëvendosje, në Komunën e Mitrovicës Jugore. “Po zyrtarisht, mirëpo kjo çështje kalon tek Agjencioni kundër Korrupsion", ka thënë ai.

Në Ministrinë e Ekonomisë kanë dhënë një interpretim të përafërt me Mujkun, duke u bazuar në nenin 17 të Ligjit për ndërmarrje publike.

Në një përgjigje të shkruar është thënë se kërkesa që lidhet me mosmbajtjen e funksioneve në parti në 36 muajt e fundit nuk zbatohet për rastin e kryeshefit.

“Përzgjedhja e z. Faruk Mujka është në përputhje të plotë me nenin 17.2 të Ligjit për Ndërmarrjet Publike, që përcakton se disa nga kushtet e pavarësisë — ndër to pozita e caktuar politike në 36 muajt e fundit — nuk zbatohen për kryeshefin ekzekutiv. Këto kushte vlejnë për bordin e drejtorëve, i cili përzgjidhet përmes konkursit dhe kryen detyrën në mënyrë të pavarur. Bordi i drejtorëve pastaj përzgjedh kryeshefin, po përmes konkursit dhe në bazë të kritereve të vlerësimit. Në këtë rast, bordi i ndërmarrjes “Ibër-Lepenci” ka vlerësuar z. Mujka si kandidatin e duhur për pozitën e kryeshefit. Vetë bordi mund të verifikojë pavarësinë dhe korrektësinë e procesit”, thuhet në përgjigjen e ME-së.

Por, e njëjta ministri kishte dhënë interpretim tjetër më 2018-n, kur Blerand Stavileci ishte kandidat për drejtor ekzekutiv të KEK-ut. Në korrespodencën e saj me KEK-un thuhet që Bordi i Drejtorëve nuk mund të zgjedhë një kryeshef ekzekutiv në ndërmarrje publike nëse ka qenë i emëruar politik gjatë periudhës prej 36 muajsh.

N.P.H, “Ibër-Lepenc” është themeluar me vendimin e Kuvendit të Kosovës me 28 Shkurt 1967, me seli në Prishtinë. Ndërkaq, kjo ndërmarrje që nga paslufta është transformuar në Ndërmarrje Publike N.H, Ibër-Lepenc” nga UNMIK-u.

© KOHA Ditore

Folegjenda: Bordi i “Ibër-Lepencit”, i emëruar prej Qeverisë së drejtuar nga partia në të cilën ka shërbyer Faruk Mujka, e ka emëruar atë kryeshef ekzekutiv