AGK: Gazetarët vazhdojnë të rrezikohen gjatë raportimeve në veri të Kosovës
Asociacioni i Gazetarëve të Kosovës ka reaguar të shtunën duke shprehur shqetësim për rrezikun që po u kanoset gazetarëve, kameramanëve dhe fotoreporterëve që po raportojnë nga veriu.
“Gjatë orëve të vona të ditës së sotme, në ndërkohë që po raportonin për situatën në veri, një eksploziv shpërtheu fare pranë ekipit të RTV Dukagjinit. Përgjatë raportimit të drejtpërdrejtë të gazetares, Doruntina Bylykbashi, shihet dhe dëgjohet shpërthim i madh”, thuhet në reagimin e AGK-së.
Ky është sulmi i dytë brenda dy ditësh ndaj ekipeve të cilat po raportojnë nga veriu i Mitrovicës, pasi disa ditë më herët u sulmua edhe ekipi i Kallxo.com.
“AGK-ja u bënë sërish thirrje institucioneve kompetente që të marrin masa për të siguruar gazetarët gjatë raportimeve të tyre në veri të Kosovës”, vijon reagimi i tyre.
Që nga e marta janë raportuar sulme të vazhdueshme në veri të vendit. Fillimisht, për shkak të zgjedhjeve të jashtëzakonshme, që u shtyn sot nga presidentja Vjosa Osmani, e më pas shkaku i arrestimit të një ish-polici që dyshohet se organizoi sulmet e ditëve më parë.
