Arbëri

Krasniqi: Qeveria u dorëzua para bandave kriminale

Kryetari i Partisë Demokratike të Kosovës, Memli Krasniqi, e ka quajtur dorëzim të Qeverisë para bandave kriminale në veri të Kosovës, mosorganizimin e zgjedhjeve, siç ishte paraparë për 18 dhjetor, dhe shtyrjen e tyre për në 23 prill të vitit të ardhshëm.

Të shtunën, presidentja Vjosa Osmani njoftoi për shtyrjen e zgjedhjeve, pas një takimi me përfaqësues të partive në vend. Ajo arsyetoi vendimin me një raport të Agjencisë Kosovare të Inteligjencës, të cilin nuk e ka bërë publik.

Krasniqi ka thënë se presidentja s’ka mandat për t’i shtyrë zgjedhjet.

“Sot, i jemi përgjigjur pozitivisht ftesës së Presidentes Osmani për takim konsultativ, duke konsideruar se mbajtja e zgjedhjeve në pjesën veriore të vendit, përveç obligim kushtetues, është edhe interes nacional. Që nga shpallja e zgjedhjeve, e tëra që kemi kërkuar si PDK nga Qeveria dhe institucionet përgjegjëse ka qenë garantimi i sigurisë dhe kushteve për zgjedhje të lira dhe demokratike. Por, fatkeqësisht, sot kuptuam se qeveria ka dështuar në zbatimin e mandatit të saj për t'i krijuar këto kushte. Përderisa për shpalljen e zgjedhjeve Presidentja përmbushi një obligim kushtetues, për shtyrjen e tyre ajo nuk ka një mandat të tillë. Konsensusi i kërkuar nga partitë politike sot nuk është obligim ligjor. Tentimi i Presidentes dhe Kryeministrit për t’u fshehur prapa këtij konsensusi është një tjetër dëshmi e paaftësisë së tyre për t’i zbatuar obligimet kushtetuese dhe për të garantuar kushte e siguri për mbajtjen e zgjedhjeve në territorin e Republikës së Kosovës”, ka shkruar ai në Facebook.

Krasniqi ka thënë se PDK-ja nuk mund ta imponojë mbajtjen e zgjedhjeve si e vetme, duke shtuar se “kjo Qeveri sot e pranoi se nuk është e aftë që të garantojë mbarëvajtjen e procesit zgjedhor të cilin e shkaktoi dhe e kërkoi edhe vet”.

“Ky dorëzim i Qeverisë para bandave kriminale në pjesën veriore të Republikës së Kosovës e dobëson shtetin, e vështirëson edhe më tej gjendjen atje dhe e sfidon tutje rendin kushtetues. Instalimi i barrikadave sot në veri, në kohën kur po merrej vendimi për mosmbajtjen e zgjedhjeve, është dëshmi se kjo tërheqje e Qeverisë nga zbatimi i ligjit dhe kushtetutës e rrezikon edhe më shumë ushtrimin e sovranitetit të plotë në katër komunat e veriut. Qeveria duhet të japë përgjegjësi për këtë prapakthim dhe për dëmin që tashmë ia ka shkaktuar vendit më veprimet e veta të pamenduara”, ka thënë tutje Krasniqi.

Kreu i PDK-së ka akuzuar kryeministrin Albin Kurti se në ditët e mëhershme ka pasur veprime të pamatura e në kundërshtim me interesat e vendit.

“Nëse kthehemi vetëm pak ditë prapa, kujtojmë se ishte pikërisht Kryeministri Kurti që nisi një zinxhir të veprimeve të pamatura dhe në kundërshtim me interesat e vendit dhe këshillat e aleatëve tanë kryesorë, SHBA-ve, të cilat si përfundim krijuan krizë institucionale e shtetërore atje. Ajo krizë, e cila vazhdoi të keqmenaxhohet, solli edhe zgjedhjet – për mbajtjen e të cilave Kryeministri dhe Qeveria tani u zbrapsën”, ka thënë Krasniqi.

Situata në veri të Kosovës është tensionuar ditëve të fundit që kur u sulmuan dhe nuk u lejuan të hyjnë në zyrat e tyre, zyrtarët e Komisionit Qendror të Zgjedhjeve në katër komunat ku parashihej mbajtja e zgjedhjeve për 18 dhjetor. Nga e enjtja ka shtim të pranisë të Policisë në veri. Një polic është plagosur si pasojë e një sulmi me armë të gjata në Zveçan.

Sot, e shtunë, presidentja e Kosovës, Vjosa Osmani vendosi që t’i shtyjë zgjedhjet për shkak të situatës së tensionuar. Në të njëjtën ditë është arrestuar një ish-polic serb i cili dyshohet për sulmet e organizuara në veri. Si protestë serbët kanë bllokuar disa rrugë në veri, e për qarkullim janë mbyllur pikat kufitare në Jarinjë e Bërnjak.

Të enjten, Serbia kërcënoi se po shqyrton mundësinë që ta dërgojë ushtrinë në Kosovë.