Arbëri

Miratohen në parim ndryshimet në Kodin e Procedurës Penale

Është miratuar në parim projektligji për plotësimin dhe ndryshimin e Kodit të Procedurës penale.

Kryetari i Kuvendit, Glauk Konjufca, njoftoi se miratimi u krye me 63 vota pro, asnjë kundër e asnjë abstenim. Prezent ishin 71 deputetë.

Një prej ndryshimeve të parapara në Projekt-Kod Penal parashohin që rastet e dhunës në familje të dalin para gjykatës brenda një afati 60 ditor, kur gjykohen nga gjyqtari individual, ndërsa brenda 90 ditësh kur gjykohen nga një trupat e gjyqtarëve.

Votimit i parapriu një përplasje mes ministres së Drejtësisë, Albulena Haxhiu, dhe deputetes së Lidhjes Demokratike të Kosovës, Doarsa Kica-Xhelili.


Përplasje mes Haxhiut e Xhelilit për dënimin e dhunuesve: Lëni avokatët t’i mbrojnë dhunuesit

Deputetja e Lidhjes Demokratike të Kosovës, Doarsa Kica – Xhelili, deklaroi se propozimet për ndryshimet në Kodin Penal nuk duhet të bëhen me eufori, por me shembuj nga vendet e tjera.

Ajo tha se propozimi i masës së paraburgimit në çdo rast të dhunimit është problematik.

“Pse na nevojitet paraburgimi i drejtpërdrejt, ndërsa në emër të dhunës po i blejmë monitoruesit për dhunuesit. Si është e mundur të flasim për paraburgim automatik. Pse duhen monitoruesit kur po bëhen paraburgimi automatik. Ky projektkod duhet të shkojë në shqyrtim nga Komisioni i Venecias...S’mund të bëjmë propozime të tilla sepse nga kjo pësojnë pikërisht viktimat.”, deklaroi ajo.

Ndërsa, ministrja Haxhiu kërkoi unitet në Kuvend kundër dhunës në familje, derisa deputeten e LDK-së, e akuzoi se po i mbron dhunuesit.

“Sot kam pritur unifikim përballë dhunës në familje, fenomen që ka pasoja të renda, jo në momentin e shkaktimit por për jetë. Lëni avokatëve ta mbrojnë dhunuesin sepse është punë e tij, por ju më shumë folët për mbrojtjen e dhunuesit, sesa të viktimë. Në vend qe të unifikoheni, ju përmendni vende të civilizuara ku është drejtësia. Në korrik të 2022, Hamide Magashi ka raportuar rastin e dhunës ndaj saj. Dhunuesi është lëshuar në procedurë të rregullt”, u shpreh ajo.

Deputetja e LDK-së tha se kjo dispozitë s'mund të zbatohet.

"S’ka gjasa që kjo dispozitë të zbatohet, për të është e rëndësishme të kalojë projektkodi", ka thënë Kica-Xhelili.

Ndërsa ministrja Haxhiu i reagoi, duke thënë se s'po mund ta marrë atë seriozisht. Haxhiu ia përmendi Kica- Xhelilit edhe ulësen e deputetes.

“Nuk mund t’i marr seriozisht njerëzit, që sapo ndryshojnë karrigen, ndryshojnë gjuhën. S’mund të të marrë seriozisht Doarsë, më vjen shumë keq. Nuk mund t’i marr seriozisht njerëzit që më shumë e kanë hallin e vetes e të klientelës, sesa të viktimave që përditë po dhunohen në shtëpitë e tyre. Je vetëm farsë”.