MASHTI shkëput Kontratën Kolektive me mësimdhënësit, SBASHK-u paralajmëron padi
Ministria e Arsimit ka shkëputur Kontratën Kolektive me Sindikatën e Bashkuar të Arsimit, e cila ishte nënshkruar në vitin e kaluar nga Qeveria Hoti.
Kontrata që parasheh kompensimin e shujtës, mbulimin e shpenzimeve të udhëtimit, e shpërblime jubilare për mësimdhënësit vlerësohet si antikushtetuese nga Ministria.
Në dokumentin e MASHTI-t thuhet se kontrata është nënshkruar 30 ditë pas vendimit të Gjykatës Kushtetuese, me të cilin ishte shpallur i pavlefshëm votimi për zgjedhjen e qeverisë së drejtuar nga Avdullah Hoti.
“Kontrata Kolektive është nënshkruar me datën 21 janar apo 30 ditë pas shpalljes së njoftimit nga Gjykata Kushtetuese lidhur me rastin KO95/20 dhe 26 ditë para mbajtjes së zgjedhjeve parlamentare në Republikën e Kosovës. Qeveria Hoti, së cilës, sipas interpretimit të Gjykatës Kushtetuese në rastin KO72/20, i mungonte autoriteti kushtetues për të ushtruar kompetencat përkatëse, nuk ka pasur legjitimitet për të qenë palë në procedurë rrjedhimisht, as ta nënshkruajë Kontratën Kolektive me SBASHK-un”, thuhet nga MASHTI.
Një tjetër arsye që është përmendur për shkëputjen e kontratës është fakti që Ministria e Financave nuk ka qenë palë nënshkruese, ndërsa është vendosur si përgjegjëse për mbulimin e shpenzimeve që rrjedhin nga ky dokument.
Po ashtu Ministria ka theksuar se Kontrata Kolektive nuk është në përputhje të plotë me Ligjin e Punës.
Ministria e Arsimit i ka kërkuar Sindikatës që të fillojnë bisedimet e përbashkëta për hartimin e një Kontrate të re Kolektive.
Në Sindikatën e Arsimit i thanë KOHËS se një veprim i tillë është antiligjor dhe për këtë do t’u drejtohen institucioneve të drejtësisë.
Kontrata Kolektive, e cila për herë të parë u nënshkrua nga ish-ministri i Arsimit, Ramë Buja në vitin 2014, asnjëherë nuk është implementuar tërësisht, nën arsyen e implikimeve të larta buxhetore.
