“Këshilltarët e humorit” përplasin Von Cramonin dhe Bërnabiqin
Raportuesja për Kosovën në Parlamentin Evropian, Viola von Cramon dhe kryeministrja e Serbisë, Ana Bërnabiq, kanë hyrë në një polemikë lidhur me dhuratën që ka pranuar presidenti serb, Aleksandar Vuçiq nga lideri çeçen, Ramzan Kadyrov të martën.
Krahasimi që ka bërë Von Cramon të asaj se ku ishte Serbia më parë dhe ku është tani, duke i publikuar dy fotografi të Vuçiqit në Twitter, që në njërën shihet pranë ish-kancelares gjermane Angela Merkel dhe në tjetrën me këshilltarin e Kadyrovit, Bërnabiqit i është dukur humor jo i këndshëm.
Ajo e ka sugjeruar Von Cramonin që ta emërojë një këshilltar për humor.
“Sapo e pashë këtë përpjekje të trishtuar për të qenë qesharake. Si një raportuese e BE-së, Violës nuk i intereson që Prishtina po injoron Marrëveshjen e Brukselit për 10 vjet, përkundrazi ajo vazhdon të merret me presidentin Aleksandar Vuçiq, duke bërë pikërisht atë që po bëjnë liderët e BE-së. Hipokrizi”, ka reaguar Bërnabiq në postimin e Von Cramonit në Twitter. “Një këshillë miqësore. Ju lutem merrni një konsulent për humor sepse ju duhet”, ka shtuar ajo.
Ironizimit që bëri kryeministrja serbe, i është përgjigjur Von Cramon, duke ia rikujtuar raportet për zbatimin e standardeve të shtetit ligjor dhe të të drejtave të njeriut.
“E shoh që keni shumë konsulentë humori kur përgatitni raporte për zbatimin e standardeve të shtetit ligjor dhe të të drejtave të njeriut”, është shprehur Von Cramon.
We see that you have many humour consultants when you are preparing reports on the implementation of the rule of law and human rights standards. https://t.co/xG7P53Wkps
Në emër të liderit çeçen Ramzan Kadyrov, këshilltari i tij në vendet arabe dhe myslimane, Turko Daudov, ka zhvilluar një takim pune të martën me presidentin e Serbisë, Aleksandar Vuçiq.
Daudov përcolli përshëndetjet nga Çeçenia për presidentin e Serbisë dhe përmes tij edhe për mbarë popullin serb, duke thënë se lidershipi dhe populli serb e mbështetën Federatën ruse, pavarësisht presionin të Perëndimit.
Ai i dhuroi Vuçiqit një burkë dhe kapelë kombëtare.
