Ish-kryetari i Ferizajt, Adem Salihaj, ka dhënë dorëheqje të dielën nga Lidhja Demokratike e Kosovës.

Salihaj ka njoftuar se pas 18 vjetësh në krye të degës së LDK-së në Ferizaj, ka ardhur momenti kur dëshiron ta përfundojë periudhën e angazhimit partiak.

Nëpërmjet një postimi në Facebook, ku ai tregoi të gjithë rrugëtimin e tij në Lidhjen Demokratike dhe kontributin që tha se ka dhënë për vendin, madje edhe duke u burgosur për 12 vjet në burgjet e ish-Jugosllavisë, Salihaj është shprehur se ndjehet krenar për atë që ka bërë.

“Të dashur veprimtarë, sot kemi ardhur në një moment kur unë dua ta përfundoj periudhën e angazhimit partiak dhe të marrin përgjegjësi gjeneratat e reja, ta vazhdojnë punën dhe aktivitetin në LDK. Shpresoj se do të gjenden njerëz që do ta vazhdojnë vizionin rugovian dhe frymën e lirisë, pavarësisë dhe demokracisë, tri shtyllat kryesore dhe tri vlerat më të mëdha të partisë sonë, të vendosura nga Presidenti Rugova”, ka shkruar ai.

Salihaj ka shtuar se nga tani e tutje me largimin nga skena politike, dëshiron që t’i përkushtohet familjes dhe shkrimeve.

“Me këtë rast unë dëshiroj t'ju falënderoj të gjithë ju veç e veç për gjithë përkrahjen që më keni dhënë në vazhdimësi në periudha të ndryshme dhe për gjithë kontributin që keni dhënë për disa dekada për Ferizajn dhe Kosovën. Kemi qenë bashkë në ditë të mira dhe të vështira, por ia kemi dalë”, është shprehur më tej ai.