MSH-ja e dënon “sjelljen jonjerëzore” të infermiereve ndaj të moshuarës në Pejë
Ministria e Shëndetësisë e ka dënuar dhunën e ushtruar ndaj të moshuarës në qendrën “Orenda” në Pejë.
MSH-ja ka thënë se infermieret e përfshira në rast janë të licencuara nga Oda e Infermierëve.
“Ministria e Shëndetësisë e dënon dhunën e ushtruar ndaj të moshuarës dhe sjelljen jo-njerëzore të infermiereve, që ka ndodhur në Shtëpinë e të moshuarve ‘Orenda’ në Pejë. Inspektorati Shëndetësor ka qenë sot për inspektim në këtë institucion privat në të cilin jepen dhe shërbime të përkujdesit shëndetësor. Të arrestuarat dhe të përfshirët në ngjarje janë të profesionit infermiere, të licencuara nga Oda e Infermierëve, Mamive dhe profesionistëve të tjerë shëndetësorë”, thuhet në njoftimin e ministrisë.
Pas inspektimit, Raporti i Inspektoratit Shëndetësor të Ministrisë së Shëndetësisë do t’i dërgohet Odës, me qëllim marrjen e masave konform ligjit, statutit, rregullave dhe kodit etik në fuqi, thuhet tutje në njoftim.
