Instituti Kombëtar i Shëndetësisë Publike ka alarmuar për variante të reja të COVID-19 që po shfaqen nëpër vende të ndryshme të botës, duke theksuar edhe një herë se masat mbrojtëse duhet të vazhdojnë për shkak se pandemia ende nuk ka përfunduar.
Sipas apelit të IKSHPK-së, Qendra Evropiane për Parandalimin dhe Kontrollin e Sëmundjeve ka thënë se këto variante mund të rrisin numrin e rasteve në javët dhe muajt e ardhshëm në rajonin e Evropës
“Në vende të ndryshme të botës, po regjistrohen raste të shumta të COVID-19, sepse pandemia ende nuk ka mbaruar. Sipas vlerësimit të fundit në SHBA, del se BQ.1 dhe BQ.1.1 janë të lidhur ngushtë dhe përbëjnë 16.6% të varianteve të koronavirusit në vend, vlerë kjo e cila gati është dyfishuar nga java e kaluar, pëderisa Evropa pret që ato të bëhen variantet dominuese brenda muajit të ardhshëm”, thuhet në njoftim.
Këto variante, sipas IKSHPk-së, janë pasardhës të nënvariantit BA.5 të Omicronit, i cili është forma dominuese e koronavirusit në Shtetet e Bashkuara. Rregullatorët në Evropë dhe SHBA kanë rekomanduar kohët e fundit dozat përforcuese të vaksinave.
Sipas virologëve dhe studiuesve të vaksinave, siç shkruan IKSHPK-ja, "këto variante (BQ.1 dhe BQ.1.1) mund të çojnë në rritje të numrit të rasteve këtë dimër në SHBA, dhe kjo rritje po vërehet në Evropë dhe Britaninë e Madhe”.
Organizata Botërore e Shëndetësisë këtë javë tha se BQ.1.1 po qarkullon në të paktën 29 vende.
“IKSHPK është duke vazhduar pandërprerë me testimin dhe gjurmimin e të gjitha rasteve, kontakteve të rasteve në komunitet dhe diagnostikimin laboratorik andaj të gjithë personat me kokëdhembje, kollitje, dhembje fyti, vështirësi në frymëmarrje, rrjedhje hundësh, temperaturë, plogështi, humbje e shijes, rekomandohen të testohen”, vijon apeli i IKSHPK-së.
MSH-ja dhe IKSHPK-ja kanë rekomanduar qytetarët që përkundër situatës së qetë dhe stabile epidemiologjike në vend, të jenë të kujdesshëm në zbatimin e masave preventive kundër sëmundjeve ngjitëse dhe të vaksinohen kundër COVID-19.
Kosova ka regjistruar kryesisht numër të vogël të rasteve pozitive me COVID-19 ditëve të fundit. Numri i rasteve aktive është vetëm 21.
© KOHA. Të gjitha të drejtat janë të rezervuara.
