Arbëri

Westerlund: Duhet të ndryshohet ritmi dhe të diskutohen detajet e “kornizës” dialoguese

 

“Jam informuar për këtë kornizë të dialogut dhe ajo që mund të them është se e mbështes emisarin e BE-së, Lajçak. Ka dallime rreth kësaj. Mendoj se është e rëndësishme se keni një agjendë të duhur dhe diskutoni për gjërat që duhet të diskutohen, pra ju e merrni vendimin për agjendën dhe fokusoheni në ato pika. Por, nuk dua të komentoj se cilat pika duhet të jenë në këtë kornizë e cilat jo. E kuptoj se ka pasur disa sugjerime nga Qeveria e Kosovës, nuk i kam detajet e saj. Por, tani mendoj se është koha të fokusohemi në detaje në mënyrë që të lëvizet përpara”, ka thënë ambasadori i Suedisë në Kosovë, Jonas Westerlund

 

Ndryshim të ritmit dhe diskutime për detajet e kornizës së re në dialog është ajo që pritet prej Kosovës dhe Serbisë javët në vijim. Kështu ka thënë Jonas Westerlund, i cili rikthehet në Prishtinë pas 22 vjetësh, tani si ambasador i Suedisë në Kosovë. Diplomati që ka ndërmjetësuar në zona të ndryshme konflikti, në vitin 1999 kishte ndihmuar në themelimin e misionit të OSBE-së në Kosovë. Me gjithë vështirësitë për shkak të së kaluarës, në një intervistë për KOHËN ai flet për mundësitë e gjetjes së një kompromisi teksa shton se është informuar edhe për kornizën e re të dialogut. Edhe pse nuk ka zbuluar detajet e kornizës, ambasadori suedez është shprehur i bindur se ajo mund të shërbejë si platformë për gjetjen e zgjidhjes finale dhe normalizimin e plotë të marrëdhënieve.