Gashi: Ligji për pensionet me mangësi të mëdha, Ministria e Financave s’na dëgjon
Njazi Gashi, kryetar i Shoqatës së Pensionistëve, thotë se Ligji për skemat pensionale ka mangësi të mëdha dhe se sipas tij, janë dërguar sugjerimet se çka duhet të ndryshohet, mirëpo shton se Ministria e Financave nuk po i merr parasysh.
Gashi ka thënë në “60 Minuta” të KTV-së të enjten, se pensionet duhet të rriten çdo vit, siç e parasheh ligji, bazuar në inflacionin në vitin paraprak, por që sipas tij kjo nuk ka ndodhur asnjëherë.
“Ne kemi provuar të kontaktojmë me organet legjislative, për fat të keq nuk kemi hasur në mirëkuptim dhe meqë nuk na kanë pranuar u kam bërë kërkesa, duke u sugjeruar se çka duhet të ndryshohet në ligjin për skema pensionale. Pensionet duhet të rriten çdo vit, të rishikohen, në bazë të inflacionit që ka ndodhur në vitin paraprak dhe kjo nuk ka ndodhur në asnjë rast, e as këtë vit”, ka thënë Gashi.
Sipas tij, dy të tretat e pensionistëve hyjnë në mesin e atyre që marrin vetëm 100 euro pension në muaj.
Gashi ka thënë po ashtu se çështja e pensionistëve ka marrë kahje të gabuar që kur Kosova ka qenë duke u administruar nga UNMIK-u.
Ai po ashtu ka thënë se ndër kërkesat e para të pensionistëve është që të lirohen nga obligimi që të lajmërohen në qendrat sociale çdo gjashtë muaj.
“Është johumane t’u kërkohet pensionistëve që të tregojnë se a janë gjallë. Kemi kërkuar që të hiqet tërësisht ky obligim, sepse ka mënyra të tjera për ta vërtetuar nëse është gjallë apo jo”, është shprehur ai.
