Arbëri

Grupi për Siguri dhe Barazi Gjinore kërkon drejtësi për 11-vjeçaren e dhunuar

Grupi për Siguri dhe Barazi Gjinore (GSBGJ) që kryesohet nga UN Women ka dënuar dhunimin e vajzës 11-vjeçare në Prishtinë dhe u ka bërë thirrje institucioneve që të marrin masa efektive për hetimin e plotë të rrethanave të rastit dhe të sigurojnë drejtësi efektive për të mbijetuarën.

GSBGJ po ashtu ka kërkuar nga mediat që të përmbahen nga publikimi i informacioneve që mund të çojnë në zbulimin e identitetit të të mbijetuarës.

“Për më tepër, Grupi për Siguri dhe Barazi Gjinore u bën thirrje institucioneve përkatëse të krijojnë shërbime të specializuara për trajtimin e dhunës seksuale, ndërkohë që duhet të angazhohen për të bashkuar përpjekjet për mbrojtjen dhe mbështetjen e të mbijetuarve të dhunës me bazë gjinore”, thuhet në njoftim.

Sipas grupit, Protokolli për trajtimin e rasteve të dhunës seksuale duhet të finalizohet urgjentisht, duke përcaktuar qartë rolet dhe përgjegjësitë e secilit institucion për mbështetjen e të mbijetuarave të dhunës seksuale.

Ndërsa, ka kërkuar nga sistemi i drejtësisë që sigurojë që autorët të mbahen penalisht përgjegjës dhe të dënohen siç parashihet me Kodin Penal të Kosovës dhe përcaktohet me Konventën e Stambollit.

“Ekzaminimet e kryera nga Instituti i Mjekësisë Ligjore të Kosovës tregojnë se shumica e viktimave të dhunës seksuale janë të mitur. Rasti i fundit i dhunimit, i kryer brutalisht ndaj një të miture është thellësisht tronditës dhe zbulon se as më të pafuqishmit nuk janë të mbrojtur”, ka thënë GSBGJ.

Grupi shtoi se lobon veçanërisht për të forcuar rolin parandalues të policisë së Kosovës përmes patrullimit të rregullt nëpër lagje, objekte për kujdesin e fëmijëve, shkolla dhe vende të tjera publike.

Grupi për Siguri dhe Barazi Gjinore u bëri thirrje palëve të ndryshme, institucioneve arsimore, komuniteteve, mediave, policisë, organizatave të shoqërisë civile dhe partnerëve të tjerë institucionalë që të bashkojnë përpjekjet për të parandaluar dhunën seksuale.