Arbëri

MSH-ja ia beson një të korruptuari ndryshimet në Ligjin për Sigurime Shëndetësore

Një i dënuar për korrupsion me vendim të formës së prerë është caktuar në majin e këtij viti si pjesë e grupit punues për ndryshimin e Ligjit të Sigurimit Shëndetësor. Nexhmedin Shaqiri është dënuar tre vjet më parë, ngase kishte kërkuar ryshfet për të kryer punën e tij zyrtare. Kryesues i grupit punues është Fatmir Plakiqi nga Fondi i Sigurimit Shëndetësor, në të cilin institucion gjatë menaxhimit të tij dyshohet se ka pasur keqpërdorime të shumta

Ndryshimi i Ligjit të Sigurimit Shëndetësor është proklamuar si një nga iniciativat kryesore legjislative të Ministrisë së Shëndetësisë, por, megjithëkëtë, një nga anëtarët e grupit punues që do të kontribuojë në këto ndryshime rrënjësore është emëruar Nexhmedin Shaqiri, i dënuar për korrupsion.

Vendimi që Shaqiri të jetë pjesë e grupit punues është marrë në maj të këtij viti. Në dokumentin për emërimin e tij, ai prezantohet si ekspert i jashtëm.

Shaqiri është ekspert financiar. Ai në të kaluarën ka qenë i angazhuar edhe nga Këshilli Gjyqësor. Por në dokumentet e Gjykatës, të siguruara nga KOHA, përshkruhet në hollësi se si ai ishte angazhuar për të kryer ekspertizë financiare për një rast, në të cilin një person kërkonte dëmshpërblim nga një bankë në Kosovë. Shaqiri e kishte kryer ekspertizën, siç i konvenonte paditësit, dhe më pas, duke dashur që t’i tregojë atij se puna ishte kryer siç ishin dakorduar, mesazhin telefonik gabimisht ia kishte dërguar drejtorit të bankës. Në fund të tij kishte shkruar se po e priste shpërblimin.

Krejt kjo përshkruhet hollësisht në aktgjykimin e Gjykatës së Apelit, i cili ia ka vërtetuar atij dënimin prej 1 viti me kusht.

“I akuzuari ka dërguar më pas sms në celularin e drejtorit të filialit të NLB Bankës në Gjilan me përmbajtje: ‘I nderuari Avdi, unë e kam përfunduar ekspertizën rreth rastit tënd. E kam mbrojt në gjykatë, kompensimin, sipas tarifave prej 150 eurove, e ka paguar avokati juaj Fahri Nuhiu në xhirollogarinë time, ndërsa mbetet të paguhet shpërblimi nga ana juaj sipas marrëveshjes...’ fakt ky që nuk është kontestuar as nga vetë i akuzuari, duke menduar se këtë sms po ia dërgonte Avdiut e jo drejtorit të bankës”, është bërë e ditur në aktgjykimin, të cilin e posedon KOHA.

Por tash e disa ditë KOHA i ka adresuar pyetje Ministrisë së Shëndetësisë për të konfirmuar nëse eksperti i përzgjedhur është personi i njëjtë me të dënuarin për korrupsion, porse përgjigje nuk ka marrë.

Këtë, megjithatë, KOHËS ia kanë konfirmuar burime të ndryshme. KOHA ka provuar që ta telefonojë, t’i dërgojë mesazhe dhe ta kontaktojë nëpërmjet rrjeteve sociale edhe vetë Shaqirin, por ai nuk është përgjigjur.

Përgjigje në secilën prej pyetjeve të KOHËS lidhur me Shaqirin ka refuzuar që të japë edhe Ministria e Shëndetësisë, duke u shmangur edhe pas riadresimit të tyre.

“Në njoftimin paraprak është bërë e ditur se institucionet përfaqësuese në grupin punues i kanë caktuar përfaqësuesit e tyre. Ndërsa, nëse ndonjë prej tyre ka ndonjë procedurë të hapur apo jo ligjore ndaj tij/saj, këtë mund ta dinë institucionet e drejtësisë”, është bërë e ditur në përgjigjën e fundit të këtij institucioni.

Paraprakisht si përgjigje ishte ofruar shpjegimi se si formohet grupi punues për punimin e një ligji.

“Zyrtarët nga administrata, në përputhje me Rregulloren e punës së Qeverisë, janë caktuar nga sekretari i përgjithshëm, ndërsa përfaqësimet e institucioneve tjera hisedare janë rekomanduar nga krerët e institucioneve respektive (d.m.th. nga vetë institucionet prej nga vijnë ata)”, është thënë në përgjigje.

Nga Ministria e Shëndetësisë është sqaruar se këshilltarët dhe ekspertët e jashtëm, siç është rasti i Nexhmedin Shaqirit, janë deleguar nga ministri Rifat Latifi.

“Gjithashtu, angazhimi i ekspertëve të jashtëm dhe i këshilltarit politik z. Kamberi (një kohë këshilltar politik i ministrit, ndërsa deri para ca ditës këshilltar i jashtëm politik i ministrit) kanë qenë rekomandime të ministrit”, thuhet në përgjigje.

Kryesues i grupit punues për këtë ligj është Fatmir Plakiqi, drejtor i Fondit të Sigurimit Shëndetësor. Ministri Latifi ia ka besuar Plakiqit këtë angazhim, ani se një hulumtim i gjatë i KOHËS ka dëshmuar për abuzime dhe probleme të mëdha gjatë menaxhimit të tij me këtë institucion. Pjesë e grupit punues është edhe drejtori financiar i Fondit të Sigurimit Shëndetësor, Liridon Dervishaj, i cili është dhëndër i ish-kryeministrit Ramush Haradinaj. Ai ishte punësuar në Fond në kohën kur Kosovën e qeveriste Haradinaj.