Deputeti i Aleancës për Ardhmërinë e Kosovës (AAK), Pal Lekaj, e ka përdorur sërish mallkimin si reagim ndaj vendimeve të partisë në pushtet për çështje të ndryshme.
Lekaj ka reaguar duke shkruar në Facebook “Qeveri, Zoti ju vraftë”, pas dështimit që të miratohet në seancën e së enjtes të Kuvendit të Kosovës, Projektligji që do të mundësonte tërheqjen e mjeteve nga Trusti.
Projektligji mori 57 vota kundër, 44 për dhe një abstenim.
Kërkesa për këtë projektligj u bë nga deputeti i PDK-së, Bekim Haxhiu, me pretendimin që tërheqja e kursimeve pensionale, që është bërë edhe njëherë në fund të vitit 2020, do t’i ndihmonte qytetarët në këtë kohë krize.
Lekaj ngjashëm ka mallkuar edhe të martën që shkoi, pasi Komisioni për Ekonomi nuk e miratoi shkarkimin e Bordit të Zyrës së Rregullatorit për Energji (ZRRE).
“Zoti ju vraftë” ishin fjalët e Lekajt pas përfundimit të mbledhjes së Komisionit të martën.
Mocioni për shkarkim ishte paraqitur nga grupi parlamentar i LDK-së, me pretendimin se ZRRE-ja nuk e ka marrë parasysh paralajmërimin e kësaj partie për krizë dhe se me vendimin për shtrenjtim të energjisë elektrike, ka bërë shkelje dhe diskriminim të konsumatorëve. VV-ja tha se kërkesa për shkarkim të Bordit të ZRRE-së, nuk ka bazë ligjore.
Për mosvotimin e projektligjit ka reaguar edhe iniciatori i kësaj nisme, deputeti i Partisë Demokratike të Kosovës, Bekim Haxhiu.
Ai ka thënë se votimi i deputetëve të pushtetit të enjten kundër "kërkesës së qytetarëve për tërheqjen e Trusitit" është zhgënjyes dhe diskriminues.
“Privimi me arrogancë numrash i së drejtës së qytetarëve për tërheqjen e deri në 30 për qind të parave në Trust, dëshmoi që ky pushtet është diskriminues, përçarës që ngufatë qytetarin skajshmërisht në varfëri në kohë krize. Premtimet për ‘Barazi dhe Drejtësi’, ‘Krejt dhe Drejt’ u rrëzuan me votën e deputetëve të pushtetit”, ka shkruar Haxhiu në Facebook.
Sipas tij, deputetët e pushtetit iu nënshtruan presionit të Qeverisë.
© KOHA. Të gjitha të drejtat janë të rezervuara.
