Lidhja Demokratike e Kosovës ka kërkuar nga Qeveria që t’ua vazhdojë kontratat e punës mbi 1000 punëtorëve shëndetësorë të cilit ishin angazhuar gjatë pandemisë.
Anëtari i Kryesisë së LDK-së, Ardian Shala, ka thënë se Qeveria po i lë pa paga 1000 familje dhe po e rëndon gjendjen ekonomike në vend.
Ai ka thënë se shtimi i infermierëve është i domosdoshëm në të gjitha institucionet e shëndetit.
“Janë vënë në pikëpyetje edhe shërbimet e tjera shëndetësore me numrin e vogël të infermierëve dhe stafit. Shtimi i kapaciteteve shëndetësore evidentohet si prioritet, sidomos rritja e numrit të infermierëve që është i domosdoshëm në cilëndo përpjekje në përballje ndaj pandemisë”, tha ai.
Shala shtoi se reduktimi i stafit tash, do ta vështirësojë edhe vaksinimin kundër COVID-19.
“Me reduktimin e stafit vaksinimi kundër COVID-19 do të rrezikohet në të gjitha komunat e Kosovës. Mungesa e infermierëve është evidente në çdo klinikë në QKUK, spitale rajonale dhe QKMF. Rast tipik është klinika Pediatrike që ka filluar rishtazi punën dhe që ballafaqohet me mungesa të mëdha të stafit”.
Shala tha se nga janari 95 mjekë janë larguar nga Kosova dhe se sipas tij, shumica e atyre që kanë mbetur në vend janë më në moshë.
“Nga janari i këtij viti 95 mjekë kanë dalë nga Kosovë dhe shumë të tjerë janë në përfundim të procedurave. Shumë shërbime tash po rrezikohen pasi shumica nga stafi janë të lodhur. Mungesa e specializimeve dhe largimi i mjekëve nga puna do ta rrisë procesin e largimit të mjekëve i cili nëse vazhdon me këtë trend do ta rrezikojë komplet sistemin shëndetësorë”, tha Shala.
Ndërsa doktor Ekrem Hyseni, anëtar i kryesisë së kësaj partie, i ka bërë thirrje Ministrisë së Shëndetësisë që t’ju vazhdojë kontratat këtyre punonjësve pasi ndryshe të njëjtit do të largohen nga vendi, tha ai.
Hyseni ka kërkuar edhe hapjen e konkursit për specializantë ndërsa bëri thirrje që të miratohet edhe Ligji i pagave, që sipas tij, do të adresonte shqetësimet e mjekëve.
“E keni një mundësi me bo diçka të mirë për shëndetësinë, ministër mos hezito, vazhdoju kontratat këtij stafit i cili e ka dhënë kontributin e tij gjatë pandemisë dhe kanë dëshmuar që janë të nevojshëm, mos të dëmtohen shërbimet nëpër klinika për mungesë të stafit të cilin veçse e kemi dhe mos t’iu hapim rrugë ikjes së tyre jashtë Kosovës. Të hapen vende të tjera të punës sipas nevojës për staf shtesë, staf i cili është i domosdoshëm... Ministër hape konkursin e specializimeve vjetore, kjo do t’i ndihmojë mjekët e rinj mos të marrin rrugën të ikin jashtë Kosovës por do t’i japin mundësinë që të japin kontributin e tyre në Kosovë... Aprovimi i Ligjit të pagave është domosdoshmëri me ju dhënë një përgjigje konkrete shqetësimit të madh i cili është niveli i pagës në sistemin shëndetësore”, tha Hyseni.
© KOHA. Të gjitha të drejtat janë të rezervuara.
