Kryetari i AAK-së, Ramush Haradinaj, ka reaguar pas dënimit me nga 4 vjet e gjysmë burgim të ish-krerëve të OVL të UÇK-së, Hysni Gucati e Nasim Haradinaj.
“Bashkëluftëtarë Hysni e Nasim, qëndroni të fortë. Lufta për liri e shtet vazhdon!” – ka shkruar Haradinaj në Facebook.
Ramush Haradinaj në postim ka shkruar disa fjalë për familjen e Nasimit.
“Stërgjyshi i tij, Xhemajli i parë, pjesëmarrës në shumë luftëra kundër pushtuesve u vra në Gjakovë te Kulla e Abdullah Pashë Drenit, në mbrojtje të Lidhjes së Prizrenit. Gjyshi i tij, Xhemajli i dytë, pjesëmarrës në të gjitha luftërat për liri. Bashkëshortja e tij, gjyshja e Nasimit, ishte bijë e Tishukëve, familje e njohur atdhetare në Dukagjin e Kosovë. Babai i tij, Smajl Haradinaj, luftëtar i paepur për të drejtën e shqiptarëve, pjesëmarrës në lëvizjet anti-jugosllave dhe për bashkim me Shqipërinë, i burgosur politik mbi 20 vjet. Nana Myzaqet, vëllai Naimi, motrat Shqipja e Naimja, bashkëshortja Xhejlanja, e veçanërisht vëllai i vogël Agroni që vuan nga një sëmundje e rëndë, e kuptojnë dhe e ndjejnë peshën e vendimit të sotëm, sepse nuk janë brezi i parë që përballohen me sfida të tilla”, ka shkruar Haradinaj.
E deputetja nga radhët e PDK-së, Blerta Deliu-Kodra, ka shprehur zhgënjimin me vendimin e sotëm të trupit gjykues në speciale.
“Jam thellësisht e befasuar me vendimin e saposhpallur të Trupit Gjykues të Dhomave të Specializuara, i cili shpalli fajtorë veteranët e UÇK-së, z. Hysni Gucatin dhe Nasim Haradinajn. Megjithatë, vazhdoj të besoj thellë se Apeli do të vërtetojë pafajësinë e tyre”, ka shkruar Deliu-Kodra.
© KOHA. Të gjitha të drejtat janë të rezervuara.
