Arbëri

Marrëveshja e Danimarkës për të marrë hua burgje në Kosovë po shihet si e dëmshme

Gazeta daneze “Altinget” ka shkruar të martën për marrëveshjen mes Danimarkës dhe Kosovës, në bazë të cilës Danimarka do të marrë hua 300 qeli të burgjeve në Kosovë.

Gazeta daneze shkruan se kjo marrëveshje është e dëmshme, pasi rrezikon fëmijët.

Danimarka do të dërgojë 300 të burgosur për të vuajtur dënimin në Kosovë.

“Fëmijët kanë të drejtë të vizitojnë prindërit e tyre të deportuar, por mund të jetë shumë e shtrenjtë dhe e rëndë, e do të mund të rrezikonte marrëdhënien e tyre me prindërit”, shkruan gazeta. “E përfundimisht mund të jetë në mospërputhje me nenin 8 të Konventës Evropiane për të Drejtat e Njeriut, që merret me të drejtën për jetë familjare”.

Një numër i organizatave joqeveritare në Danimarkë kanë reaguar ndaj marrëveshjes.

Drejtori i Children’s Terms, Rasmus Kjeldahl, është ankuar duke thënë se kjo i vë barrë të paarsyeshme fëmijëve.

“Bëhet tepër e komplikuar, e sigurt dhe me gjasë edhe e shtrenjtë, pasi nuk ke siguri për përkrahjen në transport dhe sa vizita janë të mundura gjatë vitit. Po ashtu mund të hiqet dorë nga vizitat pasi është barrë e paarsyeshme për fëmijët”, thotë Kjeldahl.

Për këtë arsye bëhet thirrje të ndryshohet ligji në mënyrë që të burgosurit që kanë fëmijë dhe janë të dënuar edhe me deportim të mos e vuajnë dënimin ne Kosovë.

Ka shqetësim se si autoritetet daneze do të garantojnë që e drejta për vizita të respektohet.

Nick Haekkerup së fundi ka dhënë dorëheqje nga posti i ministrit të Drejtësisë së Danimarkës.

Ai së fundi firmosi një Traktat me ministren e Drejtësisë së Kosovës, Albulena Haxhiu, për të marrë hua 300 qeli të burgjeve në Gjilan.

Me marrëveshje, ka për qëllim që 300 nga aktualisht 346 të huaj të dënuar me deportim ta vuajnë dënimin në Kosovë.

Projektligji do të diskutohet të premten në Parlamentin e Danimarkës.

Norvegjia në të kaluarën kishte provuar këtë model të marrjes me hua të burgjeve. Norvegjia kishte marrë qeli të burgjeve në Holandë, por tri vjet më vonë marrëveshja ndaloi për shkak të kritikave nga Avokati i Popullit.

Ministri i ri danez i Drejtësisë, Mattias Tesfaye, ka thënë se qëllimi i këtij Projektligji është të sigurohet se të drejtat e atyre të dënuar me deportim për të vuajtur dënimin në Kosovë të kenë të drejta të njëjta me të burgosurit që kanë në Danimarkë.

E Rasmus Kjeldahl nga “Children’s Terms” ka thënë se Ministria e Drejtësisë e Danimarkës duhet të jetë konkrete se si do të organizohen vizitat, sa shpesh dhe si do të ndihmohen financiarisht fëmijët për të vizituar prindërit.

Marrëveshja mes Danimarkës dhe Kosovës për marrje në hua të qelive të burgjeve kap vlerën e mbi 200 milionë eurove dhe është e vlefshme për dhjetë vjet.