Arbëri

BE-ja e quan mangësi zgjedhore votimin e qytetarëve jashtë vendit në Kosovë

Misioni i Bashkimit Evropian për vëzhgimin e zgjedhjeve në Kosovë ka adresuar një numër mangësish që duhet të adresohen në reformën zgjedhore, ndër të cilat edhe votimin e qytetarëve jashtë vendit.

Gjatë një takimi që kanë zhvilluar me kryeministrin Kurti të mërkurën, kryesuesi i këtij misioni Lukas Mandl dhe shefi i Zyrës se BE-së në Kosovë, Tomas Szunyog, kanë thënë se në reformën zgjedhore duhet të adresohen edhe financimi i partive politike, kualifikimi i kandidatëve dhe rregullat e fushatës, saktësia e listave të votuesve dhe mangësi të tjera në mënyrë që aspekti rregullativ të jetë sa më i qartë e sa më demokratik.

Pavarësisht kësaj, Mandel tha se raporti është pozitiv për Kosovën dhe se përbën raportin më pozitiv të misioneve të BE-së për vëzhgimin e zgjedhjeve.

Të gjeturat e raportit tregojnë se zgjedhjet komunale të vitit 2021 ishin të organizuara mirë, liritë themelore u respektuan gjatë fushatës dhe një numër i madh garuesish u ofruan votuesve një zgjedhje reale.

Raporti po ashtu vlerëson se KQZ-ja i bëri përgatitjet për zgjedhje në mënyrë profesionale duke respektuar të gjitha afatet ligjore dhe gëzoi një nivel të lartë besimi nga të gjitha palët e interesuara dhe se pati një fushatë të decentralizuar dhe konkurruese.

Në zgjedhjet lokale të 17 tetorit dhe më pas në rundin e dytë të tyre, të zhvilluar më 14 nëntor, ka pasur ankesa për manipulim të votave të diasporës.

Në komunën e Dragashit, ka pasur ripërsëritje të votimit me postë, pas ankesave të kandidatit të PDK-së për kryetar të kësaj komune, Shaban Shabani, se ka pas manipulim të këtyre votave. Kësisoj, Gjykata Supreme pati vendosur që votat e ardhura me postë nga jashtë për Komunën e Dragashit të mos njihen.

Pa votat e diasporës, Shabani i PDK-së kishte 47 vota më shumë, mirëpo pas numërimit të votave të diasporës, përpara me vota doli kandidati i LDK-së për kryetar të Dragashit, Bejxhet Xheladini.

Mirëpo, PDK-ja u ankua se votat dyshohen se ishin plotësuar nga i njëjti person. Kështu çështja shkoi deri në Supreme, që vendosi për rivotim të diasporës nga kjo komunë.