12 perditesime
18:41

S’kalon rezoluta e AAK-së, seanca vazhdon nesër

Me moskalimin e rezolutës së Aleancës për Ardhmërinë e Kosovës (AAK), është përmbyllur seanca e sotme.

Deputeti i AAK-së, Pal Lekaj, propozoi rezolutë me disa pika, siç janë rekomandimi i Kuvendit ndaj ZRRE-së dhe Qeverisë për mosmiratim të tarifës për energji, nxjerrjen e një mase të përkohshme për zbutjen e vështirësive ekonomike, destinimin e mjeteve shtesë buxhetore dhe subvencionim të bujqve dhe sjelljen e projektligjit për pagat. Me 22 vota për e 49 abstenime, nga 77 deputetë sa ishin në sallë, rezoluta nuk kaloi.

Kryekuvendari Glauk Konjufca njoftoi se seanca do të vazhdojë të premten në ora 10:00.

16:55

Musliu: Qytetarët po luftojnë për mbijetesë, Kurti ka mashtruar

Deputetja e Partisë Demokratike e Kosovës, Ganimete Musliu, ka deklaruar se me ardhjen e Albin Kurtit në Qeveri, shumica e çmimeve të ushqimeve janë ngritur.

Ajo deklaroi se qytetarët aktualisht po luftojnë për mbijetesë, ndërsa trend i rritjes po vazhdon.

“Rritja e çmimeve ka dëmtuar shportën e konsumatorit, qytetarët po luftojnë për mbijetesë, po vazhdon trendi i importit. Kurti ka trumpetuar se me marrjen e pushtetit do të ulet çmimi i rrymës, ujit, derivateve, e vaji, qumështi, do të kenë çmim më të ulët. Viti i Albinit ishte vit i krizës ekonomike, vit i rënies së mirëqenies së qytetarëve”, deklaroi ajo.

Musliu, duke iu drejtuar Kurtit si “lideri shpirtëror” dhe “shenjtëria e tij”, tha se Kurti i ka mashtruar qytetarët, derisa kryeparlamentari Glauk Konjufca i reagoi duke thënë se nuk lejohen “komplimentet e tepërta”.

Musliu tutje ka thënë se mashtrimi është i dënueshëm, e premtimi i rremë është vetfundosës.


Deputetja e VV-së: Qeveria s’e ka krijuar krizën

Deputetja e Lëvizjes Vetëvendosje, Fitore Pacolli-Dalipi, deklaroi se Qeveria aktuale nuk e ka krijuar krizën në të cilën gjendet vendi, mirëpo goditjet janë për shkak të politikave të gabuara nga ish-qeveritë.

“Tani jemi në krizë por kjo krizë nuk është e krijuar nga Qeveria. Goditjet që po i marrin janë për shkak të politikave të gabuara që ish-qeveritë e Kosovës i kanë ndjekur ndër vite”, tha ajo.

Pacolli-Dalipi tha se ajo çka duhet Qeveria të bëjë është t’i menaxhojë krizat, që qytetarët të dalin sa më pak të dëmtuar. Ajo përmendi edhe kriza të tjera që do ta godasin vendin.

“Ajo çka mund të bëjmë është ta menaxhojmë, të përdorim çdo mundësi që kemi që të dalim sa më shpejt dhe sa më pak të dëmtuar. Këto janë mundësitë tona, brenda natës të gjithë e kuptojmë se s’mund t’i shtojmë kapacitetet prodhuese, as në ushqime e as në energji. Çka është në dorën e kësaj qeverie është që të punojë më intensitet të lartë, të forcojë vendin që t’u bëjë ballë krizave të ardhshme që do të vijnë që dhe historia ka treguar se janë të pashmangshme”, tha tutje.

16:49

Tahiri- Hajdarit: Ishe këshilltare e Thaçit, kërkova të të shkëputej kontrata

Ministrja e Industrisë, Ndërmarrësisë dhe Tregtisë, Rozeta Hajdari, ka thënë se ka qenë këshilltare me kontratë të jashtme e Qeverisë “Çeku” dhe është trashëguar nga qeveria “Thaçi”, e pastaj edhe i është kërkuar nga ky i fundit që të bëhet këshilltare e tij, por që ajo nuk ka pranuar.

Hajdari këtë deklaratë e ka bërë të enjten, gjatë seancës së Kuvendit të Kosovës, ku po debatohet për ngritjen e çmimeve në Kosovë.

“Deputet Tahiri ju keni thënë që unë kam qenë këshilltare e ish-kryeministrit Thaçi. A mund të ma dokumentoni kur e kam pasur ndonjë kontratë ndonjëherë si ish-këshilltare e kryeministrit Thaçi, dhe a jam paguar nga Qeveria e Kosovës si ish-këshilltare e tij. Kur ma sjell atë kontratë, kur ma sjellë atë evidencë, mund të flasim. Unë isha eksperte e UNDP-së që jam paguar me kontratë të jashtme, t’i ndihmojë qeverisë Çeku, më keni trashëguar me kontratë të jashtme dhe kam punuar deri në maj të vitit 2008, pastaj më keni kërkuar që të jem këshilltare e juaj, s’kam pranuar. Kam vazhduar 3 muaj pa kontratë për të mos ju lënë ju në baltë, por mos ta lënë Kosovën në baltë sepse ishte”, ka thënë Hajdari.

Kjo ka nxitur reagimin e shefit të Grupit Parlamentar të Partisë Demokratike të Kosovës (PDK), Abelard Tahiri, i cili ka thënë se në kohën kur Thaçi ka qenë kryeministër, ai si shef i kabinetit të tij, kishte kërkuar shkëputjen e kontratës së saj si këshilltare e jashtme, pasi siç ka thënë, Hajdari ishte e paaftë.

“Ka dy lloje të këshilltarëve. Këshilltarë të jashtëm që paguhen për Qeverinë e Republikës së Kosovës nga donatorët. Kjo ka qenë një këshilltare e jashtme e kryeministrit Thaçi, të cilës unë , unë personalisht, si shef i kabinetit të kryeministrit, kamë kërkuar që t’i shkëputet kontrata. Kjo ka qenë një këshilltare e paaftë të cilës unë personalisht kam kërkuar që me ia shkëput kontratën. Këtu nuk ka asgjë personale. Pagesa e saj ka qenë përmes UNDP-së me konfirmimin e kabinetit të kryeministrit që në atë kohë ka qenë Thaçi dhe sot është fatkeqësi që një njeri i paaftë si kjo ta drejtojë një resort të tillë”, ka thënë Tahiri.

Ndërkohë, në këtë debat mes Tahirit e Hajdarit, është përfshirë edhe kryetari i Kuvendit të Kosovës, Glauk Konjufca, i cili në mënyrë ironike i ka thënë Tahirit se ai duhet ta falënderojë ministren e jo ta akuzojë.

“Po ti bre Abelard faleminderit po u deshka me i thanë, jo me akuzu”, ka thënë Konjufca duke qeshur.

13:04

Opozita akuzon Qeverinë për dështim në menaxhim të ngritjes së çmimeve

“Nga një qeveri e tinejxherëve s’mund të presim më mirë”, ka thënë deputeti i PDK-së, Ferat Shala, për Qeverinë Kurti dhe menaxhimin e saj për çështjen e ngritjes së çmimeve.

Në debatin e nisur nga AAK-ja, opozita ka akuzuar Qeverinë për dështim në menaxhim të kësaj situate.

Deputeti i AAK-së, Pal Lekaj, ka thënë se Qeveria duhet të ndërhyjë për të mos rënduar më shumë shportën e qytetarëve, ndërsa më i ashpër ndaj pushtetit është treguar deputeti i PDK-së.

“Fjalë boshe e teori konspirative”, i ka quajtur ai deklarimet e kryeministrit Kurti.

“Vetëm ka vajtuar për 20 vjetët e kaluar. Vazhdon të vajtojë nga një therë ku s’guxon të dalë me asnjë ofertë e alternativë... Ngritja e nivelit të çmimeve s’dihet kur do të ndalet e si do të vazhdojë. Kur kemi qeveri të tinejxherëve s’mund të presim më mirë. Pa vizion, jo profesional, pa përgatitje e me qasje kundër tregut të lirë...”, ka thënë ai.

Shala ka akuzuar Qeverinë aktuale se “në kohën e Qeverisë Kurti qytetarët shpenzojnë më shumë e ushqehen më pak”.

Teksa ka paraqitur shifra e statistika, ato janë përqeshur nga deputeti i LDK-së, Besian Mustafa, që i ka quajtur “masazhime të lezetshme të statistikave”.

Ndërkaq deputeti i VV-së, Armend Muja, ka thënë se disa prej shifrave të paraqitura nga opozita janë të vonuara dhe se Qeveria tashmë ka marrë disa masa.

12:42

PDK-së i dështon përpjekja për debat parlamentar për energjinë

Një mocion i Partisë Demokratike të Kosovës që në rend dite të enjten në Kuvend të përfshihet si çështje urgjente një debat parlamentar për ngritjen e çmimeve të energjisë, s’ka marrë përkrahjen e deputetëve.

Në arsyetim të kësaj kërkese, shefi i Grupit Parlamentar të PDK-së, Abelard Tahiri, ka thënë se debati shihet “me urgjencë” për shkak të përgjigjeve të Qeverisë.

“Kemi paraqitur debat parlamentar duke kërkuar më shumë përgjegjësi dhe informacione nga Qeveria për shtrenjtimin e energjisë. S’e kemi menduar për sot, por duke parë përgjigjet e Qeverisë dhe kryeministrit që thotë 'ku t’i gjej paratë', kjo çështje është urgjente. S’ka çështje më të rëndësishme se kjo për të ditur se çfarë drejtimi po merr vendi ynë për këtë krizë energjetike”, ka thënë ai.

Përkrahje mori edhe nga LDK-ja e AAK-ja, por jo nga Vetëvendosje në pushtet.

31 vota ishin pro mocionit, ndërsa 57 vota kundër.

Seanca ka vazhduar me pikat tjera të rendit të ditës.

11:21

Opozita me zhurmë ia ndërpret fjalën zv.kryeministrit Bislimi

Me rrahje të tavolinës partitë opozitare ia kanë ndërprerë fjalën zëvendëskryeministrit Besnik Bislimi, pak pasi ai iu drejtua opozitës me fjalët “po rreni”.

Ai ka akuzuar partitë në opozitë se po manipulojnë me shifrat për ngritje të çmimit të rrymës.

“U mbytëm duke iu thënë po rreni, ju prapë po rreni”, ishte fjalia që nxiti reagimin e opozitës që me zhurmë ia ndërpreu fjalën Bislimit.

Pas fjalimit, kryeparlamentari Glauk Konjufca kërkoi respekt brenda Kuvendit e shtoi se nuk ia propozon askujt fjalët e tilla.

11:01

Kurti deputetëve: Ku t’i marrim paratë për të paguar importin e shtrenjtë të rrymës

Kryeministri Albin Kurti duke u ankuar për çmimin e lartë të importit të rrymës në vend dhe duke iu përgjigjur akuzave të deputetëve të opozitës, në fjalimin e tij në Kuvend i ka pyetur deputetët se “ku duhet të merren paratë për të paguar çmimin e shtrenjtë”.

“Ku t’i marrim paratë. Askush s’dëshiron që energjia të jetë e shtrenjtë. Por dje ka kushtuar 2.5 milionë euro. Bëhet fjalë për atë që marrim nga bursat ndërkombëtare”, ka thënë ai.

Kurti është ankuar për ndërprerjet e punës në termocentrale teksa ka përsëritur akuzat për ish-qeveritë.

Ndërkaq ministrja e Ekonomisë, Artane Rizvanolli, ka mohuar deklarimet e opozitarëve duke thënë se Kosova vazhdon të jetë ndër vendet me çmimin më të lirë të rrymës në Evropë.

10:51

Gashi për Kurtin: E ka shndërruar Kosovën në një cirk terri

Image

Deputeti i Lidhjes Demokratike të Kosovës, Arben Gashi, e ka akuzuar kryeministrin Albin Kurti se e ka shndërruar vendin në një cirk terri, duke shfaqur, sipas tij, paaftësinë qeverisëse.

Gashi ka thënë se Kurti është shndërruar në një politikan akrobat.

“Qytetarët e Kosovës po përballen me një krizë të jashtëzakonshme, me rritjen e çmimit të rrymës rreth 300 për qind. Një vit më herët, ky kryeministër e projektonte veten si magjistar politik që do ta ndryshonte edhe rendin botëror. E kishte krijuar përshtypjen se bota ishte në pritje të tij, dhe tani kur kanë kaluar një vit, as nuk u shndërrua në politikan botëror, por u shndërrua në një politikan që në thelb i sjell vetëm probleme vendit të tij. U shndërrua në politikan akrobat që e ka shndërruar Kosovën në një cirk terri, duke shfaqur paaftësinë e tij qeverisëse. Ti e refuzove remontin, ti e refuzove blerjen e energjisë elektrike, ti i refuzove gjitha projektet që kanë të bëjnë me thëngjill, me erë, me ujë, me solar dhe nuk ofrove asnjë zgjidhje”, ka thënë Gashi në Kuvend.

10:50

PDK-ja kërkon të mos pranohet raporti i ZRRE-së për tarifat e reja

Image

Ferat Shala, deputet i Partisë Demokratike të Kosovës, ka thënë se “kjo është pasqyra me reale e Qeverisë Kurti”.

Sipas tij, raporti i ZRRE-së nuk parasheh zgjidhjen e tarifës për pjesën veriore. Ka thënë se Qeveria nuk duhet të lejojë rrjedhjen e miliona eurove në veri të vendit.

Ka thënë se kërkojnë nga Qeveria dhe ZRRE ta kthejë në pikën zero këtë raport në mënyrë që të gjejë alternativa më të mira.

“Ne do të kundërshtojmë këtë raport dhe jemi për debat të hapur që e kthen në pikën zero këtë raport”, ka thënë Shala.

10:45

Tahiri: Qytetari i Kosovës paguan katër herë faturën e rrymës

Image

Deputeti i Aleancës për Ardhmërinë e Kosovës, Besnik Tahiri, ka thënë se qytetari i Kosovës paguan katër herë faturën e rrymës. Sipas Tahirit, qytetari paguan faturën e KEDS-it, subvencionin prej 75 milionë eurove që Qeveria ia ka ndarë kësaj ndërmarrje, të gjithë atyre familjeve që shpenzojnë deri në 600 kWH dhe paguan rrymën në veri.

Deputeti i AAK-së shtoi se Kosova me tarifën e kërkuar nga ZRRE do të paguajë rrymën më shtrenjtë se Italia.

“Kuvendi po e nis sesionin pranveror me një situatë energjetike e cila ka rrezik ta sjell vendin, qeverinë dhe qytetarët në bankrot total. Ta marrim shembull rajonin. Maqedonia e ka rritur çmimin e energjisë vetëm për 9 për qind, Shqipëria shumë herët e ka nis ta zgjidh krizën energjetike, përderisa Kosova paguan 21 cent për 1 orë kilovat, 1 cent më shumë paguan Britania, dhe paguajmë më shumë se Italia. A jeni mend çka jeni t’u fol? A e dini në çfarë rrethana do ta sillni Kosovën nëse do ta miratoni tarifën e ZRRE? Janë mbi 200 mijë shtëpi, apo 1 milion banorë të Kosovës që shpenzojnë mbi 800 kWh. Këta do të paguajnë për të gjithë ata që shpenzojnë 600 kWh. Qytetari i Kosovës paguan katër herë faturën e rrymës. Një herë faturën e KEDS-it, herën e dytë subvencionin që kjo, herën e tretë për të gjithë ato familje që shpenzojnë deri në 600 kWh dhe herën e katërt paguan për popullin serb në veri”, ka thënë Tahiri në Kuvend.

Tutje, ai akuzoi Lëvizjen Vetëvendosje se nuk po ndjek politika të majta, ashtu siç kjo parti pretendon se është e drejtuar politikisht.

10:40

Kusari-Lila: Mungesa e vendimmarrjes nga qeveritë e kaluara po ndihet sot në sektorin e energjisë

Image

Shefja e Grupit Parlamentar të Lëvizjes Vetëvendosje, Mimoza Kusari- Lila, në seancën plenare të Kuvendit ka thënë se nuk mund të fajësohet Qeveria aktuale për situatën energjetike në vend. Ajo ka thënë se partitë që kanë qenë në pushtet në të kaluarën duhet të reflektojnë.

“Mungesa e vendimeve ndër vite në veçanti në sektorin e energjisë po ndjehet sot më shumë se kurrë. Sado që duam apo duan ta faturojnë këtë situatë energjetike Qeverisë duhet të bëjë reflektim mbi rrethanat e mungesës së vendimmarrjes që e kishin gjashtë qeveri përpara”, ka thënë ajo.

Kursaro-Lila ka thënë se amvisëritë e kanë kthyer ngrohjen me rrymë shkaku i çmimit të lirë. Kusari tha se kjo ka ardhur shkaku i heqjes së bllok-tarifave.

“Në shumë amvisëri për shkak të heqjes së bllok-tarifave shumë nga to edhe pse kishin mundësi të ngroheshin përmes alternativave tjera e kthyen ngrohjen me rrymë për arsye të çmimit më të ulët”, tha ajo.

Tutje Kusari tha se është i paevitueshëm kthimi i bllok-tarifave.

“Prandaj kthimi i bllok tarifave është i paevitueshëm pasi ishte hequr në vitin 2017 bashkë me kthimin e shprehisë së kursimit dhe vetëdijesimit të konsumatorëve për kursimin e energjisë”, tha ajo në Kuvend.

10:20

Nis seanca e Kuvendit

Kuvendi i Kosovës ka nisur seancën plenare të planifikuar për sot.

Fillimisht, në sallë munguan deputetët e LDK-së, por pas disa minutave ata nisën të vinin.

16:50

Kuvendi sot diskuton për ngritjen e çmimeve

Deputetët e Kuvendit të Kosovës do të mblidhen sot në dy seanca plenare. Seanca e parë, ajo nga ora 10:00, do të fillojë me deklarime jashtë rendit të ditës, pyetje parlamentare, për të vijuar me zëvendësimin e anëtarëve në komisionet parlamentare, si dhe debatin mbi ngritjen e çmimeve enorme.

Pas debatit, Kuvendi do të hyjë në pjesën e shqyrtimit të projektligjeve:

Projektligji për Ratifikimin e Marrëveshjes së Financimit në mes të Kosovës përfaqësuar nga Ministria e Financave dhe Asociacionit Ndërkombëtar për Zhvillim për projektin “Projekti i Reformës së Sistemit të ndihmës sociale në Kosovë”, për të vijuar me shqyrtimin e dytë të Projektligjit për të drejtat pronësore të shtetasve të huaj në Kosovë, Projektligjit për Gjykatën Komerciale, si dhe Projektligjit për ndryshimin dhe plotësimin e Ligjit për Deminim Humanitar.

Seanca pritet të vazhdojë me shqyrtimin e parë të Projektligjit për ndryshimin dhe plotësimin e Ligjit për festat zyrtare në Kosovë, për t’u përmbyllur me shqyrtimin e raportit vjetor të Komisionit të Pavarur për Miniera dhe Minerale për vitin 2020.

Në orën 15:00 do të vazhdojë seanca me pikat e papërfunduara të datave 24, 28 dhe 29 dhjetor 2021.