1 perditesime
10:36

Policia: Ndaluam futjen në Kosovë të materialit për referendumin serb

Policia e Kosovës e ka konfirmuar se në pikë-kalimin kufitar në Merdar ka pasur tentim për futje të materialit që dyshohej se do të përdorej për “referendumin” që pritet të mbahet në Serbi.

“Më 14.01.2022, në ora 21:40, në Pikën e kalimit Kufitar Merdare që lidh Serbinë me Republikën e Kosovës (RKS), në hyrje për në vendin tonë, kanë ardhur tri automjete (një veturë dhe dy kamion) me targa të Serbisë, në të cilat kanë qenë gjashtë persona. Njësitet policore gjatë realizimit të detyrave dhe procedurave-kontrolleve që zbatohen gjatë kalimeve kufitare, kanë vërejtur se në kamion kishte të ngarkuar material që dyshohej se përdoret për ‘referendumin’ që pritet të mbahet në Serbi. Bazuar në informacionet zyrtare, detyrat dhe autorizimet policore, është ndaluar hyrja në RKS, e këtij materiali i cili po transportohej pa leje përkatëse”, thuhet në njoftimin e Policisë.

Në bashkëpunim dhe koordinim me organet e drejtësisë, dy mjetet transportuese (kamionët) janë dërguar tek autoritet kompetente doganore, ndërsa pas intervistimit personat me automjetin e tyre janë kthyer mbrapa në Serbi.

09:21

Petkoviq: Policia e Kosovës konfiskoi në Merdar material për referendumin serb

Sipas mediave serbe të cilat kanë cituar Petar Petkoviqin, mbrëmjen e së premtes Policia e Kosovës ka arrestuar Marko Jankoviqin, koordinatori serb i Komisionit Republikan të Zgjedhjeve, dhe ka konfiskuar material zgjedhor për referendumin e të dielës.

Petkoviq ka thënë se materialin zgjedhor në Merdar është dashur ta marrë përsipër misioni i OSBE-së në Kosovë, por që Jankoviqi është pritr nga 10 vetura të Policisë së Kosovës aty, shkruan Kossev.

Në disa video që janë shpërndarë, shihen kamionët e Serbisë në kufi dhe kur flasin shoferët me policët, por nuk shihet se dikush është arrestuar.

Nga Petkoviqi është thënë se kanë qenë dy kamionë me material dhe se përveç Jankoviqit, janë arrestuar edhe shoferët e kamionëve.

Një ditë para referendumit serb për ndryshime kushtetuese, ende nuk dihet se a do të lejohen serbët e Kosovës të votojnë. Qeveria e Kosovës dhe spektri politik e kanë kundërshtuar këtë, duke thënë se hapja e qendrave të votimit të Serbisë në Kosovë përbën shkelje kushtetuese dhe të ligjeve të Kosovës.

Ai ka njoftuar mëngjesin e së shtunës se ata janë liruar.

“Ne i liruam njerëzit tanë, por Policia e Kosovës dhe Prishtina konfiskuan materialin për votim në referendum, gjë që është në kundërshtim me të gjitha marrëveshjet”, tha Petkoviq.

KOHA ka provuar ta kontaktojë Policinë e Kosovës, por deri në publikim e artikullit nuk ka marrë përgjigje.