Shkon në 60 numri i të shoqëruarve për dhunën në protestën e ditës së djeshme në selinë e PD-së në Tiranë, raporton Top Channel.
Në mesin e protestuesve të shoqëruar ka edhe nga Kosova.
Protesta e thirrur nga Seli Berisha në selinë e PD, nisi në mesditën e të shtunës dhe mbështetësit e Berishës dhanë shenjat se vazhdimi do ishte i dhunshëm.
Ata nisën të shajnë dhe fyejnë të gjithë deputetët që mbështesin Lulzim Bashën. I pari ishte deputeti Xhelal Mziu.
Me të njëjtën situatë u gjend edhe Roland Bejko, anëtar i kryesisë të kësaj force politike i cili edhe u godit teksa donte të hynte në selinë e PD-së. Mbështetësit e Berishës e detyruan të largohej.
“Më goditi njeri që e mbajta me bukë”, tha Bejko.
Sali Berisha mbërriti rreth orës 12 në oborrin e PD, ndërkohë që Lulzim Basha për të evituar incidentet hyri në seli që në orën 8:00. Ky ishte mesazhi i parë nga Sali Berisha.
Misioni protestuesve ishte i qartë. Futja me çdo kusht në selinë e PD-së. Ata mundën të hynë vetëm më katin e parë e tentuan pa sukses të çmontonin dyert e blinduara që të çojnë në katin e dytë.
Tentativa për të marrë selinë vijoi nga jashtë përmes shkallëve. Ata që donin të realizonin futjen nga dritaret u përballën me gaz lotsjellës i hedhur nga brenda selisë së PD.
Vendosmëria për të marrë selinë u përqendrua në një derë anësore duke vënë në përdorim leva e varre. Nga të vetmet të çara që mundët të bënin, morën mbrapsht një sasi të madhe gazi lëshuar nga brenda.
Protesta zgjati më shumë se dy orë. Ndërhyrja e policisë me kërkesën e PD bëri që të shpërndaheshin protestuesit ndërsa Berisha ndodhej brenda selisë.
Më pas, Berisha u largua në drejtim të Kryeministrisë ku edhe lajmëroi shpërndarjen e protestës.
“Shpërndahemi të merremi me të plagosurit dhe të arrestuarit”, tha Berisha.
Brenda në selinë e PD qëndruan drejtuesit, deputetët mbështetës të Bashës që mbrojtën dyert dhe policia në oborr./TCH
