Qysh në muajin korrik, Ministria e Punëve të Brendshme ka bërë listën e ngushtë të kandidatëve për pozitën e Sekretarit të Përgjithshëm. Por, deri tash nuk është bërë emërimi. Konkursi nuk është rishpallur, ani se ekspertët britanikë kanë konstatuar se asnjë nga kandidatët që janë pjesë e listës së ngushtë nuk e mbërrijnë së paku 70-përqindëshin e pikëve të nevojshme për kualifikim

Autoritetet e Qeverisë kanë shpërfillur rekomandimet e ekspertëve britanikë, edhe në procesin e emërimit të Sekretarit të Përgjithshëm të Ministrisë së Punëve të Brendshme.

Qysh në muajin korrik, Departamenti për Menaxhimin e Zyrtarëve Publikë ka shpallur njoftimin, sipas të cilit, Njësia për Zhvillimin e rekrutimit dhe Inspektimit ka bërë listën e ngushtë të kandidatëve për pozitën e Sekretarit të Përgjithshëm.

Në të janë listuar dy kandidatë.

E para është Fahrije Tërnava-Sheremeti, e cila aktualisht e ushtron detyrën e Sekretares së Përgjithshme në ministri.

Kandidat i dytë është listuar Shpend Shabani.

Është bërë kjo përzgjedhje, ani se ekspertët e Qeverisë së Britanisë së Madhe nuk kanë sugjeruar listë fare.

E konkursi nuk është rishpallur, ani se britanikët kanë konstatuar se asnjë nga kandidatët që janë pjesë e listës së ngushtë nuk ka mbërritur 70 për qind ose më shumë të pikëve, e që do t’i bënte të kualifikuar për t’u emëruar Sekretar i Përgjithshëm i Ministrisë së Punëve të Brendshme.

Marrëveshja që në qershor kryeministri Albin Kurti në emër të Qeverisë e ka firmosur me Ambasadën Britanike, kërkon që rekomandimet e ekspertëve ndërkombëtarë të merren në konsideratë.

Në pikën e 12-të të dokumentit theksohet se zgjedhja përfundimtare e kandidatit të suksesshëm - nga lista e ngushtë e përpiluar nga komisioni përkatës - do të bëhet nga institucionet kompetente të Republikës së Kosovës. Por, pika pasuese është ajo që kërkon përfshirjen e rekomandimit të britanikëve.

“Kuvendi dhe Qeveria e Republikës së Kosovës zotohen të zgjedhin kandidatët më të mirë/të ranguar më së larti nga lista e ngushtë e përgatitur nga komisioni përkatës, duke marrë parasysh rekomandimet e partnerit të jashtëm zbatues”, thuhet në pikën 13.

Gjatë ditës, Ministria e Punëve të Brendshme nuk ka treguar pse 5 muaj pas hartimit të listës së ngushtë nuk është bërë emërimi i Sekretarit të Përgjithshëm dhe as nuk e ka arsyetuar shpërfilljen e rekomandimit të ekspertëve britanikë.

Pa sekretar të Përgjithshëm ka mbetur edhe Zyra e Kryeministrit, meqë për këtë institucion ka pasur vlerësimi jo të njëjtë që ekspertët e Qeverisë dhe ata të Ambasadës Britanike kanë dhënë për kandidatin më të suksesshëm.

Departamenti për Menaxhimin e Zyrtarëve Publikë ka shpallur njoftimin, sipas të cilit Komisioni Shtetëror i Pranimit e ka listuar Florim Canollin. E ka vlerësuar me 81.7 pikë.

Pas tij e ka ranguar Arben Krasniqin me 79.9 pikë, e më pas Lulzim Beqirin me 76.9 pikë.

Ka ndodhur kështu, ani se ekspertët e Qeverisë së Britanisë së Madhe kanë sugjeruar një listë të ngushtë të kandidatëve, sipas së cilës, kandidati më i suksesshëm ishte Arben Krasniqi. Britanikët ia kanë përshkruar atij përmbushjen e 76.2 për qind të pikëve. Më pas e kanë vlerësuar Florim Canollin me 73.9 për qind, ndërsa të tretin e kanë listuar Lulzim Beqirin me 71.1 për qind.

Burime të KOHËS kanë thënë se Qeveria do që procesin ta kthejë në pikën zero, duke e rishpallur konkursin.