Institucioni i Prokurorisë së Shtetit, siç ka mësuar KOHA, ka informata që prokurorët e saj po mbajnë kontakte fshehurazi me njerëz të politikës e të ambasadave ndërkombëtare. Rrezikun që në këto takime këta prokurorë mund të nxjerrin informata të ndjeshme për institucionin, Këshilli Prokurorial i Kosovës po tenton ta eliminojë përmes një vendimi që tekstualisht ua ndalon takimet.
Pika e parë e vendimit të nënshkruar nga kryesuesi i Këshillit Prokurorial të Kosovës, Jetish Maloku, i shpjegon në detaje këto ndalesa.
“Obligohen kryeprokurorët dhe prokurorët e prokurorive të Republikës së Kosovës që për çdo komunikim me përfaqësuesit e pushteteve të tjera dhe përfaqësuesit ndërkombëtarë në Kosovë të njoftojnë mbikëqyrësit e drejtpërdrejtë të tyre, Kryeprokurorin e Shtetit dhe Kryesuesin e Këshillit Prokurorial”, thuhet në këtë vendim.
E për mosrespektim të këtij vendimi, thuhet që prokurorët do të kenë pasoja ligjore.
“Mosinformimi i saktë dhe brenda afatit të arsyeshëm kohor paraqet reagime ligjore për fillim të procedurave disiplinore”.
E raportimi duhet të bëhet me shkrim.
“Obligohen kryeprokurorët dhe prokurorët që për komunikimet e cekura në paragrafin 1 të këtij vendimi të hartojnë shënim zyrtar dhe të njëjtin ta dorëzojnë tek mbikëqyrësit e drejtpërdrejtë të tyre, Kryeprokurori i Shtetit dhe Kryesuesi i Këshillit Prokurorial të Kosovës”, thuhet në po këtë vendim.
Por, për Betim Musliun nga Instituti i Kosovës për Drejtësi një vendim i tillë nuk do të duhej të merrej nëse prokurorët do t’i dinin kompetencat e tyre.
“E para, vlerësoj që është plotësisht e panevojshme duke e ditur rolin e prokurorëve dhe kryeprokurorëve për të ushtruar përgjegjësitë e tyre. Ata kanë shumë pak, pothuajse fare përgjegjësi që të ndërlidhen me takime të ndryshme me pushtetet e tjera”, ka deklaruar ai.
Tentativat e prokurorëve që të vendosin kontakte private me politikanët, Musliu i quan dëshirë për nënshtrim ndaj tyre.
“Por si duket një praktikë e mbrapshtë e prokurorëve dhe kryeprokurorëve të caktuar është instaluar që çdo ditë ata të janë pjesë e takimeve formale dhe joformale me politikanë të ndryshëm dhe kjo si duket është shndërruar në shqetësim që ka ndikuar që të bëhet ky vendim. Përndryshe, ky vendim nuk ka logjikë përderisa nuk ka proceduara ndaj atyre prokurorëve dhe kryeprokurorëve që rrinë vazhdimisht të nënshtruar ndaj politikanëve”, ka thënë Mustafa.
Burime nga Prokuroria e Shtetit kanë thënë se ky institucion ka identifikuar disa prokurorë që kanë vendosur kontakte private me stafin politik nga kabineti i ministres së Drejtësisë. Por në këtë institucion kanë mohuar një gjë të tillë se ka ndodhur. Kanë thënë se kishte vetëm takime formale.
“Lidhur me takimet e prokurorëve me MD-në, na lejoni të ju informojmë se Ministria e Drejtësisë ka filluar disa iniciativa reformuese, pjesë e të cilave kanë qenë edhe prokurorët. Të vetmet takime në të cilat prokurorët kanë marrë pjesë, janë në kuadër të grupeve punuese në këto nisma”, thuhet në këtë përgjigje.
Nga ky institucion nuk kanë pranuar ta komentojnë vendimin e KPK-së.
“Sa i përket vendimit të Prokurorisë së Shtetit lidhur me ndalimin e komunikimit të prokurorëve me pushtetet tjera, kjo mbetet përgjegjësi e tyre dhe ne nuk komentojmë një vendim të tillë”, thuhet në përgjigjen e këtij institucioni.
Ministria e Drejtësisë ka thënë se asnjëherë nuk ka dërguar ftesa private për prokurorë.
“Ministria e Drejtësisë mbetet e përkushtuar në bashkëpunimin kushtetues ndërinstitucional, me ç’rast konsideron se ky bashkëpunim institucional është i rëndësishëm për të adresuar problemet dhe për të gjetur zgjidhjet me të cilat përballet sistemi i drejtësisë. Ministria e Drejtësisë komunikon me organet e drejtësisë përmes ftesave zyrtare drejtuar institucioneve përkatëse, jo individëve të caktuar”, thuhet në përgjigjen e këtij institucioni.
Ministria e Drejtësisë dhe Këshilli Prokurorial kanë pasur shumë përplasje kohëve të fundit, që një herë përfunduan edhe me shkëputje të raporteve.
© KOHA. Të gjitha të drejtat janë të rezervuara.
